આગામી ત્રણ કલાકમાં 29 જિલ્લામાં વરસાદ તૂટી પડશે, 11 જિલ્લામાં 'રેડ’ અને 18 જિલ્લામાં ‘ઓરેન્જ’ એલર્ટ જાહેર

Gujarat weather: આગામી કલાકોમાં વડોદરા, અમદાવાદ, કચ્છ સહિતના વિસ્તારોમાં અતિભારે વરસાદની શક્યતા; હવામાન વિભાગની ચેતવણી.

Gujarat Rain Forecast: ગુજરાતમાં આગામી કલાકોમાં ભારેથી અતિભારે વરસાદની શક્યતાને પગલે હવામાન વિભાગ દ્વારા રાજ્યના વિવિધ જિલ્લાઓ માટે એલર્ટ જાહેર કરવામાં આવ્યા છે.

સાંજે 7 વાગ્યા સુધીના સમયગાળા માટે કુલ 11 જિલ્લાઓમાં 'રેડ એલર્ટ' આપવામાં આવ્યું છે, જે સૂચવે છે કે આ વિસ્તારોમાં અત્યંત સાવચેતી રાખવાની જરૂર છે.

'રેડ એલર્ટ' હેઠળના જિલ્લાઓ: જે જિલ્લાઓમાં ભારેથી અતિભારે વરસાદની આગાહી સાથે 'રેડ એલર્ટ' અપાયું છે તેમાં વડોદરા, પંચમહાલ, ભરૂચ, નર્મદા, અમદાવાદ, આણંદ, સુરેન્દ્રનગર, મોરબી, દેવભૂમિ દ્વારકા, કચ્છ અને ભાવનગર નો સમાવેશ થાય છે. આ વિસ્તારોના નાગરિકોને ખાસ સાવચેતી રાખવા અને સુરક્ષિત સ્થળોએ રહેવા અપીલ કરવામાં આવી છે.

'ઓરેન્જ એલર્ટ' હેઠળના જિલ્લાઓ: આ ઉપરાંત, અન્ય 18 જિલ્લાઓમાં હળવાથી મધ્યમ વરસાદની સંભાવનાને પગલે 'ઓરેન્જ એલર્ટ' આપવામાં આવ્યું છે. આ જિલ્લાઓમાં દાહોદ, મહિસાગર, છોટા ઉદેપુર, સુરત, તાપી, ડાંગ, નવસારી, વલસાડ, દમણ, દાદરા અને નગર હવેલી, ગાંધીનગર, ખેડા, જામનગર, રાજકોટ, પોરબંદર, જૂનાગઢ, અમરેલી, બોટાદ, ગીર સોમનાથ અને દીવ, અરવલ્લી નો સમાવેશ થાય છે.

હવામાન વિભાગે નાગરિકોને વીજળીના કડાકા-ભડાકા સાથે વરસાદ અને તેજ પવન ફૂંકાવાની શક્યતા પણ વ્યક્ત કરી છે. નીચાણવાળા વિસ્તારોમાં પાણી ભરાવા, રસ્તાઓ પર લપસણા થવા અને ટ્રાફિક જામ જેવી પરિસ્થિતિઓ સર્જાઈ શકે છે.

સ્થાનિક વહીવટીતંત્રને પણ કોઈપણ આપત્તિજનક પરિસ્થિતિનો સામનો કરવા માટે સજ્જ રહેવા સૂચનાઓ આપવામાં આવી છે.