LPG ધારકો સાવધાન! 1 મેથી બદલાયા નિયમો, આ ભૂલ કરશો તો ગેસ કનેક્શન થશે બંધ

1 મેથી ગેસ કનેક્શનના નિયમોમાં મોટો ફેરફાર; જો તમારી પાસે ડબલ કનેક્શન કે PNG લાઇન છે તો LPG સરેન્ડર કરવું પડશે, સાથે જ E-KYC અને OTP ફરજિયાત બનાવાયા.

LPG Connection New Rules, Surrender LPG if you have PNG or lose supply

Source : ai

Show Quick Read

Key points generated by AI, verified by newsroom

• PNG કનેક્શન હોય તો LPG સિલિન્ડર સરેન્ડર કરવું પડશે.
• E-KYC અને OTP વગર સિલિન્ડર નહીં મળે.
• નિષ્ક્રિય ગ્રાહકોએ નવું સિલિન્ડર બુક કરતાં પહેલાં e-KYC કરવું.
• ડુપ્લિકેટ કનેક્શન, સબસિડીનો દુરુપયોગ રોકવા નિયમો કડક.

LPG New Rules: મધ્ય પૂર્વના દેશોમાં ચાલી રહેલા તણાવ અને વધતી મોંઘવારીની અસર હવે સીધી આપણા રસોડા સુધી પહોંચી ગઈ છે. ગેસ અને તેલના સપ્લાય પર થતી અસર અને ઓવરબુકિંગની સમસ્યાને જોતા સરકારે 1 મેથી LPG બુકિંગ અને ડિલિવરીના નિયમો કડક બનાવ્યા છે. નવા નિયમ મુજબ, જો તમારી પાસે પાઇપલાઇન ગેસ (PNG) અને LPG બંને કનેક્શન છે, તો તમારે તમારું સિલિન્ડર સરેન્ડર કરવું પડશે. આ ઉપરાંત, ગેસની કાળાબજારી રોકવા અને યોગ્ય ગ્રાહકો સુધી સુવિધા પહોંચાડવા માટે હવે E-KYC અને ડિલિવરી વખતે OTP ફરજિયાત કરી દેવામાં આવ્યો છે. જો તમે આ નિયમોનું પાલન નહીં કરો, તો તમારો ગેસ સપ્લાય અટકાવી દેવામાં આવી શકે છે.

ડબલ કનેક્શન છે? તો થઈ જાવ એલર્ટ!

આ નવા નિયમો દેશભરમાં 1 મેથી લાગુ કરી દેવામાં આવ્યા છે. જો તમારા ઘરમાં પહેલાથી જ પાઇપલાઇનવાળો ગેસ (PNG) આવે છે અને છતાં તમે LPG સિલિન્ડરનું કનેક્શન પણ ચાલુ રાખ્યું છે, તો તમારે હવે LPG કનેક્શન પાછું જમા (સરેન્ડર) કરાવવું પડશે. સરકારનું સ્પષ્ટ માનવું છે કે જે ઘરમાં PNG ની સુવિધા છે, ત્યાં સિલિન્ડર રાખવાની કોઈ જરૂર નથી. જો તમે સામેથી કનેક્શન સરેન્ડર નહીં કરો, તો તેલ કંપનીઓ જાતે જ તમારો ગેસ સપ્લાય કાપી શકે છે.

E-KYC અને OTP વગર નહીં મળે સિલિન્ડર

સૌથી મહત્વની વાત એ છે કે હવે તમામ LPG ગ્રાહકો માટે આધાર કાર્ડ બેઝ્ડ e-KYC કરાવવું ફરજિયાત બનાવી દેવાયું છે. જે ગ્રાહકોનું આધાર વેરિફિકેશન અધૂરું હશે, તેમને ગેસનો નવો બાટલો નહીં મળે. જોકે, રાહતની વાત એ છે કે જેમણે પહેલાથી જ e-KYC કરાવી લીધું છે, તેમણે આ પ્રક્રિયા ફરીથી કરવાની જરૂર નથી.

આ ઉપરાંત, ઘણા વિસ્તારોમાં હવે ગેસની ડિલિવરી વખતે OTP ફરજિયાત કરવામાં આવી રહ્યો છે. જ્યારે ડિલિવરી બોય સિલિન્ડર આપવા આવશે, ત્યારે તમારા રજિસ્ટર્ડ મોબાઈલ નંબર પર એક OTP આવશે. આ OTP ડિલિવરી બોયને આપ્યા પછી જ તમને સિલિન્ડરની ડિલિવરી કરવામાં આવશે.

જૂના અને નિષ્ક્રિય ગ્રાહકો માટે ખાસ નિયમ

અહેવાલો પ્રમાણે, જે ઘરોમાં જૂન 2025 પહેલા છેલ્લી વાર સિલિન્ડર ભરાવવામાં આવ્યો હતો અને ત્યારથી કોઈ બુકિંગ નથી થયું, તેમને સંભવિત નિષ્ક્રિય (inactive) ગ્રાહક ગણવામાં આવી શકે છે. આવા લોકોએ નવો બાટલો બુક કરાવતા પહેલા ફરજિયાત પોતાનું e-KYC પૂરું કરવું પડશે.

સરકારે અચાનક આટલા કડક નિર્ણયો કેમ લીધા?

ઓઇલ કંપનીઓના જણાવ્યા અનુસાર આ નવા ફેરફારો પાછળના મુખ્ય કારણો આ મુજબ છે:

એક જ ઘરમાં ચાલતા ડબલ (ડુપ્લિકેટ) કનેક્શન અટકાવવા.

સબસિડીવાળા સસ્તા સિલિન્ડરનો દુરુપયોગ રોકવો.

લાંબા સમયથી નિષ્ક્રિય પડેલા એકાઉન્ટ કાયમ માટે બંધ કરવા.

ઘરોમાં જરૂર કરતાં વધારે સિલિન્ડરોનો સંગ્રહ (હોર્ડિંગ) થતો અટકાવવો.

એક ગ્રાહક તરીકે તમારે હવે શું કરવું જોઈએ?

જો તમે પણ LPG નો ઉપયોગ કરો છો અને કોઈ અગવડતાથી બચવા માંગો છો, તો વહેલી તકે આટલા કામ પતાવી લો:

સૌથી પહેલા તમારા ગેસ ડિસ્ટ્રીબ્યુટર (એજન્સી) પાસે જઈને તમારું e-KYC પૂરું કરાવી લો.

જો એજન્સીમાં તમારો હાલનો મોબાઈલ નંબર અપડેટ ન હોય, તો તેને તાત્કાલિક નોંધાવી દો.

તમારું આધાર કાર્ડ તમારા બેંક ખાતા સાથે લિંક છે કે નહીં તે ખાસ ચેક કરી લો.

જો તમારા નામે કોઈ વધારાનું કે ડુપ્લિકેટ કનેક્શન ચાલતું હોય તો તેને તરત બંધ કરાવી દો.

તમારા વિસ્તારમાં PNG (પાઇપલાઇન ગેસ) કનેક્શન ઉપલબ્ધ છે કે નહીં તેની તપાસ કરો.