Sahara Refund Portal: સહારા રોકાણકારોને રૂ. 10,000 થી વધુ રકમ ક્યારે મળશે? ગૃહમંત્રીએ આપી માહિતી

Sahara Refund Portal: કેન્દ્રીય સહકારી પ્રધાન અને દેશના ગૃહ પ્રધાને જણાવ્યું છે કે 10,000 રૂપિયાથી વધુની રકમ રોકાણકારોને ક્યારે ટ્રાન્સફર કરવામાં આવશે.

પ્રતિકાત્મક તસવીર

Sahara Refund Portal: કેન્દ્રીય સહકારી પ્રધાન અને ગૃહ પ્રધાન અમિત શાહે ફરી એકવાર સહારા જૂથની સહકારી મંડળીઓના થાપણદારોને ખાતરી આપી છે કે આગામી સમયમાં તેમની સંપૂર્ણ રકમ પરત કરવામાં આવશે. સરકારે ગયા મહિને CRCS સહારા રિફંડ પોર્ટલ રજૂ કર્યું હતું જેથી થાપણદારો સહારા જૂથની ચાર સહકારી મંડળીઓમાં ફસાયેલા તેમના નાણાંનો દાવો કરી શકે.

સુપ્રીમ કોર્ટે 'સેબી-સહારા રિફંડ એકાઉન્ટ'માંથી સેન્ટ્રલ રજિસ્ટ્રાર ઑફ કોઓપરેટિવ સોસાયટીઝ (CRCS)ને રૂ. 5,000 કરોડ ટ્રાન્સફર કરવાની મંજૂરી આપ્યા બાદ આ પોર્ટલ શરૂ કરવામાં આવ્યું હતું. સહારા જૂથની સહકારી મંડળીઓના રોકાણકારોને 10,000 રૂપિયાનો પ્રથમ હપ્તો મળવા લાગ્યો છે. શુક્રવારે અમિત શાહે દિલ્હીમાં સહારા રિફંડ પોર્ટલ દ્વારા સહારા જૂથની સહકારી મંડળીઓના થાપણદારોને દાવાની રકમ ટ્રાન્સફર કરી હતી.

ગૃહમંત્રી અમિત શાહે કહ્યું કે 112 લાભાર્થીઓને 10,000 રૂપિયાનો પ્રથમ હપ્તો ટ્રાન્સફર કરવામાં આવ્યો છે. CRCS સહારા રિફંડ પોર્ટલ પર અત્યાર સુધીમાં 18 લાખ લોકોએ પોતાનું રજીસ્ટ્રેશન કરાવ્યું છે. તેમાંથી 14 લાખ થાપણદારોની અરજીઓ મંજૂર કરવામાં આવી છે.

10 હજારથી વધુ રકમ ક્યારે મળશે

આ પોર્ટલ જુલાઈમાં લોન્ચ કરવામાં આવ્યું હતું. સહારા ગ્રુપની ચાર સહકારી મંડળીઓમાં જેમના નાણા ફસાયેલા છે તેવા રોકાણકારો આ પોર્ટલ દ્વારા રિફંડ માટે અરજી કરી શકે છે. અત્યારે માત્ર 10,000 રૂપિયા સુધીના હપ્તા મોકલવામાં આવી રહ્યા છે. બાદમાં, ટૂંક સમયમાં તેનો બીજો હપ્તો અથવા સંપૂર્ણ રકમ આપવાની જાહેરાત કરવામાં આવી શકે છે. ગૃહમંત્રીએ કહ્યું કે તેઓ નજીકના ભવિષ્યમાં સમગ્ર રકમ પરત કરવામાં સફળ થશે.

થાપણદારોએ શું કરવું જોઈએ?

સહારા જૂથના તમામ થાપણદારોએ CRCS સહારા રિફંડ પોર્ટલ પર પોતાને નોંધણી કરાવવાની અને રિફંડ માટે પાત્ર બનવા માટે અરજી પ્રક્રિયા પૂર્ણ કરવાની જરૂર છે. સેબી સહારા રિફંડ એકાઉન્ટમાં રૂ. 23,000 કરોડથી વધુ છે. સરકારને અપેક્ષા છે કે થાપણદારોને વર્તમાન રૂ. 5000 કરોડ આપ્યા બાદ સહારા રિફંડ ખાતામાં વધુ રકમ ટ્રાન્સફર કરશે.

નોંધનીય છે કે સહકાર મંત્રાલયે સહારા ગ્રુપની સહારા ક્રેડિટ કો-ઓપરેટિવ સોસાયટી લિમિટેડ, સહારાયન યુનિવર્સલ મલ્ટીપર્પઝ સોસાયટી, હમારા ઈન્ડિયા ક્રેડિટ કો-ઓપરેટિવ સોસાયટી લિમિટેડ અને સ્ટાર્સ મલ્ટીપર્પઝ કોઓપરેટિવ સોસાયટી લિમિટેડ પાસે પૈસા જમા કરાવનારા રોકાણકારોને રિફંડ મેળવવા માટે સુપ્રીમ કોર્ટમાં અરજી દાખલ કરી હતી. આ પછી સુપ્રીમ કોર્ટે 5000 કરોડ રૂપિયા CRCSને ટ્રાન્સફર કરવાનો આદેશ આપ્યો હતો.