ટાટાની કંપનીઓમાં બધુ બરાબર નથી ચાલી રહ્યું! TCS બાદ હવે ટાટા સ્ટીલે 38 કર્મચારીઓને કાઢી મુક્યા, જાણો શું છે કારણ
Tata Steel News: એન ચંદ્રશેખરનએ જણાવ્યું હતું કે ટાટા સ્ટીલને છેલ્લા નાણાકીય વર્ષ 2022-23માં 875 ફરિયાદો મળી હતી.
Tata Steel Sacks Employees: TCS પછી, ટાટા સ્ટીલે પણ કંપનીની આચાર સંહિતાનું ઉલ્લંઘન કરવા બદલ 38 કર્મચારીઓને નોકરીમાંથી કાઢી મૂક્યા છે. ટાટા સ્ટીલના ચેરમેન એન ચંદ્રશેખરને કંપનીની એજીએમમાં આ માહિતી આપી છે. આ કર્મચારીઓ સામે હોદ્દાનો દુરુપયોગ કરવા, અંગત લાભ માટે નિર્ણયો લેવા અને કોન્ટ્રાક્ટ મેનેજમેન્ટ એગ્રીમેન્ટનો ભંગ કરવા બદલ આ કાર્યવાહી કરવામાં આવી છે.
કંપનીને આ કર્મચારીઓ વિરુદ્ધ વ્હિસલ બ્લોઅર્સ તરફથી ફરિયાદો મળી હતી. આ 38 કર્મચારીઓમાંથી 35ને અનૈતિક વ્યવહાર અને ત્રણને જાતીય ગેરવર્તણૂક બદલ સસ્પેન્ડ કરવામાં આવ્યા છે. એન ચંદ્રશેખરને જણાવ્યું હતું કે ટાટા સ્ટીલને છેલ્લા નાણાકીય વર્ષ 2022-23માં 875 ફરિયાદો મળી હતી. જેમાં 158 વ્હીસલ બ્લોઅરની હતી, 48 સુરક્ષા સંબંધિત હતી, 669 એચઆર સંબંધિત હતી અને કેટલીક ફરિયાદો આચરણ સંબંધિત હતી. એન ચંદ્રશેખરને કહ્યું કે વધુ ફરિયાદો મેળવવી એ ખોટી વાત નથી કારણ કે તે કંપનીની ઓપન કલ્ચરને દર્શાવે છે. તેમણે કહ્યું કે અહીં કર્મચારીઓને તેમની ફરિયાદ નોંધવા માટે પ્રોત્સાહિત કરવામાં આવે છે.
અગાઉ ટાટા કન્સલ્ટન્સી સર્વિસે લાંચ લઈને ભરતી કૌભાંડમાં સંડોવાયેલા કર્મચારીઓ સામે મોટી કાર્યવાહી કરી હતી. TCSએ 6 કર્મચારીઓને નોકરીમાંથી કાઢી મૂક્યા. તેમજ ભરતીમાં સામેલ છ બિઝનેસ એસોસિયેટ ફર્મ પર પ્રતિબંધ મુકવામાં આવ્યો હતો. એન ચંદ્રશેખરન દ્વારા ટીસીએસના કર્મચારીઓ સામે લેવાયેલી કાર્યવાહી પણ એજીએમમાં શેર કરવામાં આવી હતી. શેરધારકો સાથે વાત કરતા એન ચંદ્રશેખરને કહ્યું કે છ કર્મચારીઓને કાઢી મુકવામાં આવ્યા છે જેમનું વર્તન નૈતિકતા વિરુદ્ધ હતું. એન ચંદ્રશેખરને કહ્યું કે તે તમામ છ કર્મચારીઓ અને આવી છ બિઝનેસ એસોસિએટ ફર્મ પર પ્રતિબંધ મૂકવામાં આવ્યો છે. વધુ ત્રણ કર્મચારીઓ સામે તપાસ ચાલુ છે.
TCS નબળાઈઓ અને ખામીઓ માટે સમગ્ર બિઝનેસ એસોસિયેટ સપ્લાય મેનેજમેન્ટ પ્રક્રિયાની સમીક્ષા કરશે. અને તે સુનિશ્ચિત કરશે કે આવી ઘટનાઓ ફરીથી ન બને. જો કે દેશના સૌથી જૂના ઉદ્યોગ ગૃહમાં એક પછી એક આવી ઘટનાઓ બહાર આવી રહી છે તે ચિંતાજનક છે.
તમને જણાવી દઈએ કે TCSનું નામ દુનિયાની સૌથી મોટી વર્કફોર્સ ધરાવતી કંપનીઓમાં પણ સામેલ છે. માર્ચ 2023ના ક્વાર્ટરના પરિણામો રજૂ કરતા કંપનીએ કહ્યું હતું કે FY23 દરમિયાન 22,600 કર્મચારીઓને નોકરી આપવામાં આવી હતી. 31 માર્ચ 2023 સુધીમાં કંપનીના કર્મચારીઓની સંખ્યા 6,14,795 હતી.
Join Our Official Telegram Channel: https://t.me/abpasmitaofficial
ટ્રેન્ડિંગ સમાચાર
ટોપ સ્ટોરી
