રાજ્યની નગરપાલિકાઓ અને મહાનગરપાલિકાઓ માટે એક જ દિવસમાં ૧૦૦૦ કરોડ રૂપિયા મંજૂર

મુખ્યમંત્રી ભૂપેન્દ્ર પટેલ દ્વારા સ્વર્ણિમ જયંતિ મુખ્યમંત્રી શહેરી વિકાસ યોજના અંતર્ગત શહેરી જનસુવિધા અને ઈઝ ઓફ લિવિંગ વધારવા માટે ભંડોળની ફાળવણી.

મુખ્યમંત્રી ભૂપેન્દ્ર પટેલ (ફાઈલ ફોટો)

Source : એબીપી લાઇવ

ગાંધીનગર: મુખ્યમંત્રી ભૂપેન્દ્ર પટેલે રાજ્યના શહેરી વિકાસને વધુ વેગ આપવા માટે એક મહત્વપૂર્ણ નિર્ણય લીધો છે. તેમણે એક જ દિવસમાં રાજ્યની ૧૭ નગરપાલિકાઓ, ૭ મહાનગરપાલિકાઓ અને ૩ શહેરી વિસ્તાર વિકાસ સત્તામંડળો માટે વિવિધ વિકાસ કામો માટે કુલ રૂ. ૧૦૦૦.૮૬ કરોડ મંજૂર કર્યા છે.

મહાનગરો, શહેરી વિસ્તાર વિકાસ સત્તામંડળ અને ‘ક’ તથા ‘ડ’ વર્ગની નગરપાલિકાઓને શહેરી જનસુવિધા અને સુખાકારી માટે આ નાણાં ફાળવવાનો મુખ્ય ધ્યેય શહેરી વિસ્તારોમાં ‘ઈઝ ઓફ લિવિંગ’ એટલે કે જીવન જીવવાની સરળતામાં વધારો કરવાનો છે.

લાભાર્થી શહેરો અને સત્તામંડળો:

• ૧૭ નગરપાલિકાઓ: રાધનપુર, ઊંઝા, કડી, નડીયાદ, માણસા, ધાનેરા, દહેગામ, ભરૂચ, પાલનપુર, ડભોઈ, મુન્દ્રા-બારોઈ, ચોટીલા, થરા, વિરમગામ, દ્વારકા, આણંદ અને વાઘોડિયા.
• ૭ મહાનગરપાલિકાઓ: ગાંધીનગર, અમદાવાદ, જુનાગઢ, રાજકોટ, વડોદરા, જામનગર અને ભાવનગર.
• ૩ શહેરી વિસ્તાર વિકાસ સત્તામંડળો: ભાવનગર, વડોદરા અને જામનગર.

સ્વર્ણિમ જયંતિ મુખ્યમંત્રી શહેરી વિકાસ યોજના અંતર્ગત ફાળવણી:

આ ભંડોળ સ્વર્ણિમ જયંતિ મુખ્યમંત્રી શહેરી વિકાસ યોજના અંતર્ગત વિવિધ ઘટકોમાં ફાળવવામાં આવ્યું છે, જે નીચે મુજબ છે:

• મુખ્યમંત્રી શહેરી સડક યોજના: રૂ. ૧૪૧.૩૭ કરોડ
• આંતર માળખાકીય સુવિધાના વિકાસ કામો: રૂ. ૫૦૦.૪૩ કરોડ
• ખાનગી સોસાયટી જન ભાગીદારી યોજનાના કામો: રૂ. ૩૬.૩૮ કરોડ
• આઉટ ગ્રોથ એરિયાના વિકાસ કામો: રૂ. ૧૪૮.૧૧ કરોડ

વડાપ્રધાન નરેન્દ્રભાઈ મોદીએ ગુજરાતના તત્કાલીન મુખ્યમંત્રી તરીકે ૨૦૧૦માં વધતા જતા શહેરીકરણ અને શહેરોમાં વધતી જનસંખ્યાની સુવિધા માટે સ્વર્ણિમ જયંતિ મુખ્યમંત્રી શહેરી વિકાસ યોજના શરૂ કરી હતી. મુખ્યમંત્રી ભૂપેન્દ્ર પટેલના નેતૃત્વ હેઠળની રાજ્ય સરકારે આ યોજનાની સફળતાને ધ્યાનમાં રાખીને તેને ૨૦૨૬-૨૭ સુધી ચાલુ રાખવાનો નિર્ણય લીધો છે.

વિવિધ કામો માટે ફાળવણીની વિગતો:

• મુખ્યમંત્રી શહેરી સડક યોજના હેઠળ મુન્દ્રા-બારોઈ નગરપાલિકાને માર્ગોની મરામત અને નવા માર્ગો માટે રૂ. ૭.૭૫ કરોડ, વાઘોડિયા નગરપાલિકાને રૂ. ૪.૪૬ કરોડ, ડભોઇને રૂ. ૧.૭૫ કરોડ અને જુનાગઢ, જામનગર અને ભાવનગર મહાનગરપાલિકાઓને અનુક્રમે રૂ. ૨૫ કરોડ, રૂ. ૪૭.૫૩ કરોડ અને રૂ. ૫૪.૮૮ કરોડ મંજૂર કરવામાં આવ્યા છે.
• ખાનગી સોસાયટી જન ભાગીદારી ઘટકમાં સોસાયટીઓમાં પેવર બ્લોક, ઘરગટર જોડાણ અને પાણીની પાઇપલાઇન જેવા કામો માટે વડોદરા અને ગાંધીનગર મહાનગરપાલિકા વિસ્તારમાં રૂ. ૧.૬૦ કરોડ ઉપરાંત ‘બ’, ‘ક’ અને ‘ડ’ વર્ગની નગરપાલિકાઓ માટે રૂ. ૩૪.૭૮ કરોડ મંજૂર કરવામાં આવ્યા છે.
• આઉટગ્રોથ એરિયા ડેવલપમેન્ટ અંતર્ગત જુનાગઢ, ભાવનગર, રાજકોટ મહાનગરપાલિકા અને ચોટીલા, ધાનેરા, દહેગામ, ભરૂચ અને પાલનપુર નગરપાલિકાઓને રૂ. ૧૪૮.૧૧ કરોડ ફાળવવામાં આવ્યા છે.
• આંતરમાળખાકીય સુવિધાના કામો અંતર્ગત અમદાવાદ મહાનગરપાલિકાને સ્ટોર્મ વોટર લાઇન માટે રૂ. ૩૬.૨૭ કરોડ, ભાવનગર અર્બન ડેવલપમેન્ટ ઓથોરિટીને રૂ. ૧૮.૨૭ કરોડ, ઊંઝા નગરપાલિકાને રૂ. ૪.૭૦ કરોડ, વડોદરા શહેરી વિકાસ સત્તામંડળને ભૂગર્ભ ગટર યોજના માટે રૂ. ૫૧.૭૨ કરોડ અને જામનગર, ભાવનગર મહાનગરપાલિકાને અનુક્રમે રૂ. ૨૪૫.૪૮ કરોડ અને રૂ. ૨૪૬.૬૦ કરોડ મંજૂર કરવામાં આવ્યા છે. રાધનપુરમાં પાણી પુરવઠાના કામો માટે રૂ. ૪૧.૩૪ કરોડની મંજૂરી આપવામાં આવી છે.
• થરા નગરપાલિકાને ગાર્ડન એન્ડ એમ્યુઝમેન્ટ પાર્ક માટે રૂ. ૪ કરોડ મંજૂર કરવામાં આવ્યા છે.

સ્વર્ણિમ જયંતિ મુખ્યમંત્રી શહેરી વિકાસ યોજનામાં ૨૦૧૦થી અત્યાર સુધીમાં રૂ. ૬૧,૯૭૭ કરોડનું બજેટ પ્રાવધાન થયું છે, જેના અંતર્ગત મહાનગરપાલિકા અને નગરપાલિકાઓને આંતરમાળખાકીય વિકાસના ૬૭,૩૬૦ કામો મંજૂર કરીને રૂ. ૩૨,૬૪૭ કરોડની ગ્રાન્ટ ચૂકવવામાં આવી છે.

આ પણ વાંચો...