Target Killing: ટાર્ગેટ કિલિંગના વિરોધમાં શિવસેના આજે જમ્મુમાં કરશે વિરોધ પ્રદર્શન, કાશ્મીરી પંડિતોને સુરક્ષા આપવાની માંગ

તાજેતરમાં જમ્મુ અને કાશ્મીરમાં કાશ્મીરી પંડિતોને નિશાન બનાવવામાં આવી રહ્યા છે

ફાઇલ તસવીર

Shiv Sena Protest in Jammu: તાજેતરમાં જમ્મુ અને કાશ્મીરમાં કાશ્મીરી પંડિતોને નિશાન બનાવવામાં આવી રહ્યા છે. કાશ્મીર ખીણમાં આતંકવાદીઓ સતત ટાર્ગેટ કિલિંગને અંજામ આપતા જોવા મળે છે. જેની સામે આજે શિવસેના વિરોધ પ્રદર્શન કરશે. આ સાથે શિવસેનાએ ભાજપને કાશ્મીરી પંડિતોને સુરક્ષા આપવાની અપીલ કરી છે. શિવસેનાનો આ વિરોધ આજે બપોરે 12 વાગ્યે શરૂ થશે.

જમ્મુ-કાશ્મીરમાં આતંકવાદીઓ સતત નાગરિકોને નિશાન બનાવી રહ્યા છે. આ સ્વતંત્રતા દિવસ પર, કાશ્મીર ઘાટીમાં કાઢવામાં આવેલી તિરંગા માર્ચથી ગુસ્સે ભરાયેલા આતંકવાદીઓ દ્વારા 16 ઓગસ્ટ, મંગળવારે બે કાશ્મીરી પંડિતોની ગોળી મારીને હત્યા કરવામાં આવી હતી. કાશ્મીર ખીણમાં લઘુમતીઓ અને કાશ્મીરી પંડિતોની હત્યાના વિરોધમાં શિવસેના આજે જમ્મુમાં વિરોધ પ્રદર્શન કરશે.

કાશ્મીરી પંડિતોને સુરક્ષા આપવાની માંગ

શિવસેનાએ દાવો કર્યો છે કે ભાજપે કાશ્મીર ખીણમાં તિરંગા રેલીની ધામધૂમથી ઉજવણી કરી હતી, પરંતુ તેણે કાશ્મીરી પંડિતોને સુરક્ષા આપવામાં ભૂલ કરી છે. શિવસેનાએ સવાલ કર્યો છે કે ઘાટીમાં તિરંગા રેલી બાદ કાશ્મીરી પંડિતોની સુરક્ષા કોણ સુનિશ્ચિત કરશે. આ સાથે શિવસેનાએ કેન્દ્ર સરકારને અપીલ કરી છે કે ઘાટીમાં કાશ્મીરી પંડિતોની સુરક્ષા માટે પૂરતી વ્યવસ્થા કરવામાં આવે.

 આઠ મહિનામાં અત્યાર સુધીમાં 27 હત્યા થઈ

જમ્મુ-કાશ્મીરમાં છેલ્લા આઠ મહિનામાં આતંકવાદીઓએ રાહુલ ભટ્ટ અને સાંબાની રજની બાલા સહિત 27 લોકોની હત્યા કરી છે. આતંકવાદીઓની ટાર્ગેટ કિલિંગનો ભોગ બનેલા લોકોમાં કાશ્મીરી પંડિતો ઉપરાંત સુરક્ષાકર્મીઓ અને મુસ્લિમ સમુદાયના સભ્યો પણ સામેલ છે. મોટાભાગે હિન્દુ સમુદાયના લોકો ઉપરાંત સાત પોલીસકર્મીઓ આતંકવાદીઓના નિશાન બન્યા છે. રાજસ્થાનના એક બેંક મેનેજર અને બિહારના ત્રણ મજૂરો પણ મૃતકોની યાદીમાં સામેલ છે.