Omicron ના વધતા ખતરા વચ્ચે રાજ્યો સતર્ક, જાણો કેટલા રાજ્યોમાં Night Curfew સહિતના પ્રતિબંધો લાદવામાં આવ્યા
દેશમાં કોરોના વાયરસના કેસ ફરી એકવાર ઝડપથી વધી રહ્યા છે. આ સિવાય નવા વેરિઅન્ટ Omicron પણ કેસ ધીમે ધીમે વધી રહ્યા છે.ઓમિક્રોનના 578 કેસની પુષ્ટિ થઈ છે.
દેશમાં કોરોના વાયરસના કેસ ફરી એકવાર ઝડપથી વધી રહ્યા છે. આ સિવાય નવા વેરિઅન્ટ Omicron પણ કેસ ધીમે ધીમે વધી રહ્યા છે. થોડા દિવસોમાં ઓમિક્રોનના 578 કેસની પુષ્ટિ થઈ છે. ઓમિક્રોન વેરિઅન્ટને વર્લ્ડ હેલ્થ ઓર્ગેનાઈઝેશન (WHO) દ્વારા વેરિઅન્ટ ઓફ કોન્સર્ન તરીકે ગણાવ્યું છે. આ સિવાય અત્યાર સુધીના અભ્યાસમાં એવો દાવો કરવામાં આવ્યો છે કે તે પહેલા આવેલા કોરોના વાયરસના પ્રકારો કરતા વધુ ઝડપથી ફેલાય છે. આ બાબતોને ધ્યાનમાં રાખીને, કેન્દ્રની સલાહ પછી, દેશના ઘણા રાજ્યોએ સાવચેતીભર્યા નિયંત્રણો લાગુ કરવાનું શરૂ કર્યું છે. સોમવાર સુધી, 10 રાજ્યોએ નાઇટ કર્ફ્યુ લાદવાની જાહેરાત કરી છે.
દિલ્હી
કોરોનાના વધતા જતા કેસ અને નવા વેરિઅન્ટ ઓમિક્રોનના ખતરાને કારણે દિલ્હીમાં સોમવારે રાત્રે 11 વાગ્યાથી નાઇટ કર્ફ્યુ લાગુ થશે. દિલ્હી ડિઝાસ્ટર મેનેજમેન્ટ ઓથોરિટી (DDMA) ના આદેશ અનુસાર, તે તમામ વ્યક્તિઓની હિલચાલ પ્રતિબંધિત કરવામાં આવશે જેઓ છૂટ આપવાની શ્રેણીમાં આવતા નથી. DDMAએ જણાવ્યું કે, નાઇટ કર્ફ્યુ રાત્રે 11 વાગ્યાથી સવારે 5 વાગ્યા સુધી આગામી આદેશો સુધી ચાલુ રહેશે.
ઉત્તરાખંડ
ઉત્તરાખંડમાં કોરોના વાયરસના ઓમિક્રોન વેરિઅન્ટના ખતરાને ધ્યાનમાં રાખીને સોમવારથી નાઇટ કર્ફ્યુ લાદવામાં આવ્યો હતો. રાજ્યના મુખ્ય સચિવ એસએસ સંધુએ એક આદેશમાં જણાવ્યું છે કે આગામી આદેશ સુધી સોમવારથી રાત્રે 11 વાગ્યાથી સવારે 5 વાગ્યા સુધી કર્ફ્યુ અમલમાં રહેશે. જો કે, આરોગ્ય, આરોગ્ય કર્મચારીઓને લઈ જતા વાહનો, એમ્બ્યુલન્સ, ટપાલ સેવાઓ જેવી આવશ્યક સેવાઓની અવરજવરને કર્ફ્યુમાંથી મુક્તિ આપવામાં આવી છે. એલપીજી, પેટ્રોલ, ડીઝલના ઉત્પાદન, પરિવહન અને વિતરણને પણ પ્રતિબંધમાંથી મુક્તિ આપવામાં આવશે.
ઉત્તર પ્રદેશ
ઉત્તર પ્રદેશમાં શનિવાર 25 ડિસેમ્બરથી નાઇટ કર્ફ્યુ લાગુ કરવામાં આવ્યો છે. નાઇટ કર્ફ્યુ દરરોજ 11 વાગ્યાથી સવારે 5 વાગ્યા સુધી લાગુ રહેશે. કોવિડ પ્રોટોકોલ સાથે, લગ્ન વગેરે જેવા જાહેર કાર્યક્રમોમાં 200 જેટલા લોકોને ભાગ લેવાની મંજૂરી આપવામાં આવી છે. આયોજક સ્થાનિક પ્રશાસનને આ અંગે જાણ કરશે.
મધ્યપ્રદેશ
મધ્યપ્રદેશ સરકારે ગુરુવાર (24 ડિસેમ્બર)થી સાવચેતીના ભાગરૂપે રાજ્યમાં રાત્રે 11 વાગ્યાથી સવારના 5 વાગ્યા સુધી નાઈટ કર્ફ્યુ લાદવાનો નિર્ણય લીધો છે. આ સાથે લોકોને કોરોના પ્રોટોકોલનું ચુસ્તપણે પાલન કરવાની સલાહ આપવામાં આવી છે. મુખ્યમંત્રી શિવરાજ સિંહ ચૌહાણે સાંજે લોકોને એક સંદેશમાં કહ્યું, "અમે આજે વધુ એક નિર્ણય લઈ રહ્યા છીએ કે રાત્રે 11 વાગ્યાથી સવારના 5 વાગ્યા સુધી નાઈટ કર્ફ્યુ લાદવામાં આવશે. જો જરૂર પડશે, તો અમે ચોક્કસપણે કેટલાક અન્ય પગલાં લઈશું.
કર્ણાટક
કર્ણાટક સરકારે 28 ડિસેમ્બરથી 10 દિવસ માટે રાત્રે 10 વાગ્યાથી સવારે 5 વાગ્યા સુધી નાઈટ કર્ફ્યુ લાદવાનો નિર્ણય લીધો છે. સરકારે સાર્વજનિક સ્થળો પર નવા વર્ષ સંબંધિત તમામ કાર્યક્રમો પર પ્રતિબંધ મૂક્યો છે. જ્યારે ખાણીપીણી, હોટલ, પબ, ક્લબ અને રેસ્ટોરન્ટને 28 ડિસેમ્બરથી 2 જાન્યુઆરી સુધી તેમની કુલ બેઠક ક્ષમતાના 50 ટકા પર કામ કરવા માટે કહેવામાં આવ્યું છે.
કેરળ
કેરળ સરકારે પણ ઓમિક્રોનના વધતા જોખમ વચ્ચે રાજ્યમાં રાત્રિ કર્ફ્યુ લાદવાનો નિર્ણય લીધો છે. કેરળમાં રાત્રે 10 વાગ્યાથી સવારના 5 વાગ્યા સુધી નાઈટ કર્ફ્યુ લાગુ રહેશે. આ કર્ફ્યુ 30મી ડિસેમ્બરથી શરૂ થશે અને 2જી જાન્યુઆરી સુધી ચાલશે.
ગુજરાત
ઓમિક્રોનના ખતરાને ધ્યાનમાં રાખીને, ગુજરાતના આઠ મહાનગરોમાં (અમદાવાદ, વડોદરા, સુરત, રાજકોટ, ભાવનગર, જામનગર, ગાંધીનગર અને જૂનાગઢ)માં રાત્રે 11 વાગ્યાથી સવારના 5 વાગ્યા સુધી નાઇટ કર્ફ્યુ લાગૂ કરાયો છે.
આસામ
નવા વર્ષની ઉજવણીને ધ્યાનમાં રાખીને, આસામ સરકારે શનિવારે કોરોના વાયરસ સંબંધિત નવી સૂચનાઓ જારી કરી અને કહ્યું કે 31 ડિસેમ્બરે રાજ્યમાં નાઇટ કર્ફ્યુ રહેશે નહીં. સરકારે તમામ લોકોને માસ્ક પહેરવા સહિત કોવિડ-યોગ્ય વર્તન જાળવવા વિનંતી કરી અને કહ્યું કે જેઓ આમ નહીં કરે તેમની સામે કાયદેસરની કાર્યવાહી કરવામાં આવશે અને તેમને દંડ કરવામાં આવશે. રાજ્યના આરોગ્ય પ્રધાન કેશવ મહંતાએ જણાવ્યું હતું કે, "સંશોધિત સૂચનાઓ સમગ્ર રાજ્યમાં 26 ડિસેમ્બરે સવારે 6 વાગ્યાથી આગળના આદેશો સુધી લાગુ રહેશે." તેમણે કહ્યું કે નવી સ્ટાન્ડર્ડ ઓપરેટિંગ પ્રોસિજર (SOP) મુજબ, નાઇટ કર્ફ્યુ 11.30 વાગ્યાથી સવારે 6 વાગ્યા સુધી અમલમાં રહેશે, જો કે તે 31 ડિસેમ્બરની રાત્રે લાગુ થશે નહીં.
હરિયાણા
કોરોના વાયરસના ઓમિક્રોન પ્રકારને ધ્યાનમાં રાખીને, હરિયાણા સરકારે સંક્રમણના ફેલાવાને રોકવા માટે ગયા શનિવારથી રાત્રિ કર્ફ્યુ લાદી દીધો છે. આ કર્ફ્યુ રાત્રે 11 વાગ્યાથી સવારે 5 વાગ્યા સુધી લાગુ રહેશે. સરકારે ઇન્ડોર અને આઉટડોર ઇવેન્ટ્સમાં અનુક્રમે 200 અને 300 લોકો સુધીની મહત્તમ સંખ્યા મર્યાદિત કરી છે. આ પ્રતિબંધ શનિવારથી શરૂ થયો છે, જે આવતા વર્ષે 5 જાન્યુઆરી સુધી લાગુ રહેશે.
મહારાષ્ટ્ર
મહારાષ્ટ્રની ઉદ્ધવ ઠાકરે સરકારે પણ કોરોના વાયરસના નવા પ્રકારોના ભય વચ્ચે નવા નિયંત્રણો લાદવાનો નિર્ણય લીધો છે. રાજ્યમાં જાહેર સ્થળોએ રાત્રે 9 વાગ્યાથી સવારના 6 વાગ્યા સુધી 5 થી વધુ વ્યક્તિઓ પર પ્રતિબંધ મુકવામાં આવ્યો છે. ઇન્ડોર લગ્નોમાં વધુમાં વધુ 100 લોકોને અને આઉટડોર લગ્નો માટે વધુમાં વધુ 250 લોકોને મંજૂરી છે. આ પ્રતિબંધો 25 ડિસેમ્બરથી લાગુ થઈ ગયા છે.
ટ્રેન્ડિંગ સમાચાર
ટોપ સ્ટોરી
