સરકારે ઇલેક્ટ્રિક વ્હીકલ બેટરી અને મોબાઇલ પાર્ટ્સ પર હટાવી ઇમ્પોર્ટ ડ્યૂટી, જાણો શું છે કારણ?
અમે સ્થાનિક ઉત્પાદનને પ્રોત્સાહન આપવા તેમજ નિકાસ સ્પર્ધાત્મકતા વધારવા માટે કાચા માલ પરની આ ડ્યૂટી ઘટાડી રહ્યા છીએ.
ઇલેક્ટ્રિક વ્હિકલ અને મોબાઇલ ફોન ઉત્પાદક કંપનીઓને રાહત આપતા કેન્દ્ર સરકારે બંનેના ઉત્પાદનમાં વપરાતા આવશ્યક પાર્ટ્સ પરની આયાત ડ્યુટી નાબૂદ કરી છે. મંગળવારે સરકારે આ જાહેરાત કરી હતી.
આ નિર્ણય વિશે માહિતી આપતાં કેન્દ્રીય નાણાં પ્રધાન નિર્મલા સીતારમણે જણાવ્યું હતું કે સ્થાનિક ઉત્પાદનને પ્રોત્સાહન આપવા અને નિકાસ સ્પર્ધાત્મકતાને મજબૂત બનાવવાના પ્રયાસરૂપે આ નિર્ણય લેવામાં આવ્યો છે. આ ટેરિફની સંભવિત અસર ઘટાડવા માટે વ્યાપક ડ્યૂટી કાપનો એક ભાગ છે.
સંસદમાં નાણાકીય વટહુકમ 2025 પસાર થાય તે પહેલાં નાણામંત્રીએ કહ્યું હતું કે - અમે સ્થાનિક ઉત્પાદનને પ્રોત્સાહન આપવા તેમજ નિકાસ સ્પર્ધાત્મકતા વધારવા માટે કાચા માલ પરની આ ડ્યૂટી ઘટાડી રહ્યા છીએ.
નોંધનીય છે કે અગાઉ ન્યૂઝ એજન્સી રોઇટર્સના એક અહેવાલમાં કહેવામાં આવ્યું હતું કે ભારત સરકાર ટ્રમ્પ સરકાર સાથેની વાતચીતના પ્રથમ રાઉન્ડમાં લગભગ 1.9 લાખ કરોડ રૂપિયાની કિંમતની યુએસ આયાતના અડધાથી વધુ પર ડ્યુટી ઘટાડવાનું વિચારી રહી છે.
કેન્દ્ર સરકાર દ્વારા ઇલેક્ટ્રિક વાહનો અંગે લેવામાં આવેલા નિર્ણયને કારણે EV બેટરીના ઉત્પાદનમાં વપરાતા 35 ઉત્પાદનોને આયાત ડ્યુટીમાંથી મુક્તિ આપવામાં આવશે. જ્યારે મોબાઇલ ફોનના ઉત્પાદનમાં વપરાતા 28 ઉત્પાદનો પર કોઈ આયાત ડ્યુટી વસૂલવામાં આવશે નહીં.
અમેરિકાના રાષ્ટ્રપતિ તરીકે ડોનાલ્ડ ટ્રમ્પ ફરીથી ચૂંટાયા પછી તેમણે 2 એપ્રિલથી પારસ્પરિક ટેરિફની જાહેરાત કરી હતી. આવી સ્થિતિમાં વિશ્વભરમાં ટ્રેડ વોર ફાટી નીકળવાની સંભાવના છે. જોકે, ભારતે અમેરિકન ઉત્પાદનો પર આયાત ડ્યુટીમાં છૂટછાટ આપવાનો સંકેત આપ્યો છે. અમેરિકાના ઉચ્ચ સ્તરીય પ્રતિનિધિમંડળ સાથે આ અંગે વ્યાપક ચર્ચા થવાની અપેક્ષા છે. આવી સ્થિતિમાં સ્થાનિક ઉત્પાદનને પ્રોત્સાહન આપવાના સંદર્ભમાં સરકારનું આ એક મહત્વપૂર્ણ પગલું માનવામાં આવી રહ્યું છે.
નાણા મંત્રાલય દ્વારા આપવામાં આવેલી માહિતી અનુસાર, છેલ્લા ૧૦ વર્ષમાં ભારતનું વિદેશી દેવું ૨૫૦ બિલિયન ડોલરથી પણ વધુ વધી ગયું છે. મંત્રાલયને લોકસભામાં એક પ્રશ્ન પૂછવામાં આવ્યો હતો કે ૩૧ માર્ચ, ૨૦૧૪ના રોજ દેશ પર કુલ કેટલું વિદેશી દેવું હતું અને ૩૧ ડિસેમ્બર, ૨૦૨૪ સુધીમાં તે કેટલું થઈ ગયું છે. આ પ્રશ્નના જવાબમાં નાણા મંત્રાલયે જણાવ્યું કે સપ્ટેમ્બર ૨૦૨૪ની સ્થિતિએ દેશ પર ૭૧૧.૮ બિલિયન યુએસ ડોલરનું વિદેશી દેવું છે, જ્યારે ૩૧ માર્ચ, ૨૦૧૪ના રોજ આ આંકડો ૪૪૬.૨ બિલિયન યુએસ ડોલર હતો. આ આંકડાઓ સ્પષ્ટપણે દર્શાવે છે કે છેલ્લા ૧૦ વર્ષમાં દેશનું વિદેશી દેવું આશરે ૨૬૫.૬ અબજ ડોલર જેટલું વધ્યું છે. આ આંકડો દેશની આર્થિક સ્થિતિ અંગે ગંભીર ચિંતાઓ ઊભી કરે છે.
ટોપ સ્ટોરી
ટ્રેન્ડિંગ સમાચાર
