IND vs AFG: T20 વર્લ્ડ કપમાં ભારતે પ્રથમ જીત મેળવી, અફઘાનિસ્તાનને 66 રને હરાવ્યું

અફઘાનિસ્તાને એક સમયે 12મી ઓવરમાં માત્ર 69 રનમાં પોતાની પાંચ વિકેટ ગુમાવી દીધી હતી. ત્યારે એવું લાગી રહ્યું હતું કે ટીમ ઈન્ડિયા મોટા માર્જિનથી જીતશે.

ટીમ ઇન્ડિયા

ICC T20 WC 2021, IND vs AFG: ભારતીય ક્રિકેટ ટીમને આખરે 2021 T20 વર્લ્ડ કપમાં પહેલી જીત મળી છે. અબુ ધાબીના શેખ જાયદ ક્રિકેટ સ્ટેડિયમમાં રમાયેલી સુપર 12 મેચમાં ટીમ ઈન્ડિયાએ અફઘાનિસ્તાનને 66 રનથી હરાવ્યું. ટોસ હાર્યા બાદ બેટિંગ કરવા ઉતરેલી ભારતીય ટીમે 20 ઓવરમાં બે વિકેટ ગુમાવીને 210 રન બનાવ્યા હતા. જવાબમાં અફઘાનિસ્તાનની ટીમ નિર્ધારિત ઓવરમાં સાત વિકેટના નુકસાને 144 રન જ બનાવી શકી હતી. આ ટૂર્નામેન્ટમાં અફઘાનિસ્તાનની આ બીજી હાર છે.

અફઘાનિસ્તાને એક સમયે 12મી ઓવરમાં માત્ર 69 રનમાં પોતાની પાંચ વિકેટ ગુમાવી દીધી હતી. ત્યારે એવું લાગી રહ્યું હતું કે ટીમ ઈન્ડિયા મોટા માર્જિનથી જીતશે. પરંતુ સુકાની મોહમ્મદ નબી અને ઓલરાઉન્ડર કરીમ જનાતે છઠ્ઠી વિકેટ માટે 57 રન જોડી પોતાની ટીમની હારના માર્જીનને નોંધપાત્ર રીતે ઘટાડી દીધું હતું. મોહમ્મદ નબીએ 32 બોલમાં બે ચોગ્ગા અને એક છગ્ગાની મદદથી 35 રન બનાવ્યા હતા. તે જ સમયે જનાતે 22 બોલમાં અણનમ 42 રનની ઇનિંગ રમી હતી. તેના બેટમાંથી ત્રણ ચોગ્ગા અને બે છગ્ગા આવ્યા હતા.

આ સિવાય અફઘાનિસ્તાન તરફથી હઝરતુલ્લા ઝાઝાઈએ 13, મોહમ્મદ શહઝાદે 00, રહેમાનુલ્લા ગુરબાઝે 10 બોલમાં 19 રન, ગુલાબદીન નાયબે 20 બોલમાં 18 રન અને નજીબુલ્લાહ ઝદરાને 13 બોલમાં 11 રન બનાવ્યા હતા.

ભારત તરફથી મોહમ્મદ શમીએ ચાર ઓવરમાં 32 રન આપીને ત્રણ વિકેટ ઝડપી હતી. ઉપરાંત, આ મેચમાંથી લગભગ ચાર વર્ષ પછી મર્યાદિત ઓવરના ક્રિકેટમાં પરત ફરેલા રવિચંદ્રન અશ્વિને શાનદાર પ્રદર્શન કર્યું હતું. તેણે પોતાની ચાર ઓવરમાં માત્ર 14 રન આપીને બે વિકેટ ઝડપી હતી.

રોહિત અને રાહુલની ધમાકેદાર શરૂઆત

ટોસ હાર્યા બાદ પ્રથમ બેટિંગ કરવા ઉતરેલી ટીમ ઈન્ડિયાને આજે ઓપનર રોહિત શર્મા અને કેએલ રાહુલે શાનદાર શરૂઆત કરી હતી. બંનેએ 14.4 ઓવરમાં પ્રથમ વિકેટ માટે 140 રન જોડ્યા હતા. રોહિત 47 બોલમાં 74 રન બનાવીને આઉટ થયો હતો. તેણે આઠ ચોગ્ગા અને ત્રણ છગ્ગા ફટકાર્યા હતા. તે જ સમયે કેએલ રાહુલે 48 બોલમાં 69 રનની ઇનિંગ રમી હતી. આ દરમિયાન રાહુલના બેટમાંથી છ ચોગ્ગા અને બે છગ્ગા આવ્યા હતા.

શાનદાર શરૂઆત કર્યા બાદ કેપ્ટન કોહલીએ વિસ્ફોટક બેટ્સમેન રિષભ પંતને ત્રીજા નંબર પર મોકલ્યો. પંતે માત્ર 13 બોલમાં ત્રણ સિક્સરની મદદથી અણનમ 27 રન બનાવ્યા હતા. તે જ સમયે ચોથા નંબર પર બેટિંગ કરવા આવેલા હાર્દિક પંડ્યાએ 13 બોલમાં અણનમ 35 રનની ઇનિંગ રમી હતી. પંડ્યાના બેટમાંથી ચાર ચોગ્ગા અને બે છગ્ગા આવ્યા હતા.

બીજી તરફ અફઘાનિસ્તાન તરફથી ગુલાબદીન નાયબ અને કરીમ જનાતને એક-એક વિકેટ મળી હતી. સ્ટાર સ્પિનર ​​રાશિદ ખાનને કોઈ સફળતા મળી નથી. તેણે પોતાની ચાર ઓવરમાં કુલ 36 રન આપ્યા.