ડોનાલ્ડ ટ્રંપે બાંગ્લાદેશને આપ્યો મોટો ઝટકો! અમેરિકી મદદ રોકવાના આદેશ 

યુએસ એજન્સી ફોર ઇન્ટરનેશનલ ડેવલપમેન્ટ (USAID) એ બાંગ્લાદેશમાં તેની તમામ સહાય અને પ્રોજેક્ટને રોકવાનો આદેશ આપ્યો છે.

અમેરિકાના રાષ્ટ્રપતિ ડોનાલ્ડ ટ્રંપ

Source : Getty Images

America stopped aid to Bangladesh: યુએસ એજન્સી ફોર ઇન્ટરનેશનલ ડેવલપમેન્ટ (USAID) એ બાંગ્લાદેશમાં તેની તમામ સહાય અને પ્રોજેક્ટને રોકવાનો આદેશ આપ્યો છે. આ નિર્ણયને બાંગ્લાદેશની યુનુસ સરકાર માટે મોટો ઝટકો માનવામાં આવી રહ્યો છે. ટ્રમ્પના સત્તામાં આવ્યા બાદ આ પહેલું મોટું પગલું છે, જેના કારણે બાંગ્લાદેશને વિકાસ કાર્યો માટે મળનારી મદદ બંધ થઈ જશે. તેના નિર્ણયમાં યુએસએઆઈડીએ તમામ પ્રકારના વર્ક ઓર્ડર, કોન્ટ્રાક્ટ અને પ્રોક્યોરમેન્ટ પ્રક્રિયાઓ પર પ્રતિબંધ મૂક્યો છે. USAID બાંગ્લાદેશમાં આરોગ્ય, શિક્ષણ, કૃષિ અને આર્થિક સુધારા જેવા ક્ષેત્રોમાં મોટા પાયે સહાય પૂરી પાડે છે. આ નિર્ણયથી ત્યાં ચાલી રહેલા ઘણા મહત્વપૂર્ણ પ્રોજેક્ટ ખોરવાઈ શકે છે.

USAID દ્વારા પત્ર જારી કરવામાં આવ્યો છે

યુએસએઆઈડીએ ફંડિંગ સસ્પેન્શન અંગેના તેના પત્રમાં યુએસ પ્રમુખ ડોનાલ્ડ ટ્રમ્પના તાજેતરના એક્ઝિક્યુટિવ ઓર્ડરને ટાંકીને જણાવ્યું હતું કે, "આ પત્ર તમામ USAID/બાંગ્લાદેશ અમલીકરણ ભાગીદારોને નિર્દેશ આપી રહ્યો છે કે તેઓ  USAID/બાંગ્લાદેશના કરારો, કાર્ય આદેશ, અનુદાન સરકારી કરાર અથવા અન્ય સહાયતા કે અધિગ્રહણ સાધન હેઠળ  કોઈપણ કાર્યને તાત્કાલિક બંધ કરે અથવા સસ્પેન્ડ કરે. 

અમેરિકાના રાષ્ટ્રપતિ ડોનાલ્ડ ટ્રમ્પે વિદેશી મદદ બંધ કરી દીધી

યુએસ પ્રમુખ ડોનાલ્ડ ટ્રમ્પના વહીવટીતંત્રે શુક્રવારે એક વ્યાપક આદેશમાં ઇઝરાયેલ અને ઇજિપ્ત સિવાય યુક્રેન સહિત તમામ વિદેશી સહાય પર પ્રતિબંધ મૂક્યો હતો. આ આદેશ સામાન્ય સહાયથી લઈને સૈન્ય સહાય સુધીની દરેક વસ્તુને અસર કરશે. ઇઝરાયેલ અને ઇજિપ્તને ફક્ત કટોકટીની ખાદ્ય સહાય અને લશ્કરી સહાયને મુક્તિ આપવામાં આવી છે.

"જ્યાં સુધી દરેક નિર્ણયની સમીક્ષા અને મંજૂર કરવામાં ન આવે ત્યાં સુધી નવી સહાયતા અથવા વર્તમાન સહાયના વિસ્તરણ માટે કોઈ નવું ભંડોળ બહાર પાડવામાં આવશે નહીં," સ્ટાફને મોકલવામાં આવેલા મેમોમાં જણાવ્યું હતું કે આ પગલું યુએસ પ્રમુખ ડોનાલ્ડ ટ્રમ્પની 'અમેરિકા ફર્સ્ટ' નીતિને અનુરૂપ છે, જેમાં એ વિદેશમાં મદદ માટે ખૂબ જ કડક અભિગમ અપનાવવામાં આવ્યો છે.  

અમેરિકાની કમાન સંભાળતાની સાથે જ રાષ્ટ્રપતિ ડોનાલ્ડ ટ્રમ્પે એક પછી એક એવી જાહેરાતો કરી છે જેને લઈ સમગ્ર વિશ્વમાં તેની ચર્ચાઓ થઈ રહી છે.  અમેરિકામાં રહેતા ગેરકાયદે પ્રવાસીઓને પણ પરત મોકલવામાં આવી રહ્યા છે.