હોકીમાં ભારતની છોકરીઓએ પછાડતાં ઓસ્ટ્રેલિયાની આ સ્ટાર ખેલાડી ધ્રુસકે ધ્રુસકે રડી પડી, રડતી રડતી મેદાન બહાર ગઈ ને....

ઓસ્ટ્રેલિયાની મહિલા હોકી ટીમની સભ્ય હાર બાદ

ટોક્યોઃ ટોક્યો ઓલિમ્પિકના 11માં દિવસે મહિલા હોકીની ક્વાર્ટર ફાઇનલમાં ભારતે ઓસ્ટ્રેલિયા સામે જીત મ ળવીને ઈતિહાસ રચ્યો એ મેચમાં ગુરજીત કૌરે રંગ રાખ્યો હતો. ભારતની ગુરજીત કૌરે મેચની 22મી મિનિટે ગોલ કરીને 1-0ની લીડ અપાવી હતી. ગુરજીતે ડાયરેક્ટ ફ્લિક વડે ગોલ કર્યો હતો.

ઓલિમ્પિકમાં આ સાથે ભારતની મહિલા હોકી ટીમ પહેલી વાર સેમી ફાઈનલમાં પ્રવેશ મેળવ્યો છે. ઓસ્ટ્રેલિયા આ મેચમાં જીત માટે પ્રબળ દાવેદાર મનાતી હતી પણ ભારતીય ટીમે શાનદાર દેખાવ કરીને ઓસ્ટ્રેલિયાની ટીમને ધૂળચાટતી કરી દેતાં ઓસ્ટ્રેલિયન ખેલાડીઓ હતાશ થઈ ગઈ હતી.

ઓસ્ટ્રેલિયાની સ્ટાર ખેલાડી બ્રુક પેરીસ તો એ હદે હતાશ થઈ ગઈ હતી કે મેદાન પર જ રડી પડી હતી. ઓસ્ટ્રેલિયાની ખેલાડી એડવિના બોને તેને ગલે લગાડીને શાંત રાખવા પ્રયાસ કર્યો હતો પણ બ્રુક પેરીસ રડતી જ રહી હતી. પેરીસ રડતી રડતી બહાર ગઈ હતી. કોચ અને બીજા સ્ટાફે તેને શાંત કરવા પ્રયાસ કર્યો હતો પણ તે પોતાનાં આંસુ રોકી જ નહોતી શકી.

આ મેચમાં ભારતની ગોલકીપરના શાનદાર દેખાવના કારણે ઓસ્ટ્રેલિયાએ ડ્રેગ-ફ્લિકથી ગોલ ગુમાવ્યો હતો.

ભારતે હાફ ટાઈમ સુધી લીડ જાળવી રાખી હતી. પ્રથમ ક્વાર્ટરના અંત સુધીમાં બંને ટીમોએ કોઈ ગોલ કર્યો ન હતો પણ બીજા ક્વાર્ટરમાં ભારતે સરસાઈ મેળવી હતી.