T20 World Cup Prize Money: આઈસીસીએ ટી20 વર્લ્ડ કપ પ્રાઇઝ મનીની કરી જાહેરાત, વિજેતા ટીમ પર થશે રૂપિયાનો વરસાદ

આ વર્ષે આ ટુર્નામેન્ટમાં રેકોર્ડ 20 ટીમો રમી રહી છે. આ કારણે તેને અત્યાર સુધીનો સૌથી મોટો T20 વર્લ્ડ કપ કહેવામાં આવી રહ્યો છે

T20 વર્લ્ડકપ પ્રાઇઝ મની

Source : ICC

T20 World Cup 2024: ICC એ T20 વર્લ્ડ કપ 2024 માટે ઈનામી રકમની જાહેરાત કરી છે. આઇસીસીએ ટુર્નામેન્ટ માટે રૂ. 93.51 કરોડ (US$11.25 મિલિયન)નું ઇનામી રકમનું બજેટ રાખ્યું છે, જે એક રેકોર્ડ છે. આ અગાઉની તમામ ICC T20 વર્લ્ડ કપ ટૂર્નામેન્ટ કરતાં વધુ છે. તે જ સમયે, ગયા વર્ષે ભારતમાં યોજાયેલા ODI વર્લ્ડ કપમાં ઈનામી રકમનું બજેટ 82.93 કરોડ રૂપિયા (US$ 10 મિલિયન) હતું. ભારતીય ટીમ 5 જૂને આયર્લેન્ડ સામે પોતાના અભિયાનની શરૂઆત કરશે. ટુર્નામેન્ટની ફાઈનલ 29 જૂને યોજાશે.

ICCએ સોમવારે ઈનામી રકમની જાહેરાત કરી

ICCએ સોમવારે કહ્યું કે વિજેતા ટીમને 20.36 કરોડ રૂપિયા (US$2.45 મિલિયન) મળશે. અગાઉના T20 વર્લ્ડ કપમાં વિજેતા ટીમને આટલા પૈસા મળ્યા ન હતા. આ વર્ષે આ ટુર્નામેન્ટમાં રેકોર્ડ 20 ટીમો રમી રહી છે. આ કારણે તેને અત્યાર સુધીનો સૌથી મોટો T20 વર્લ્ડ કપ કહેવામાં આવી રહ્યો છે. તે જ સમયે, ફાઇનલમાં હારનાર ટીમને રૂ. 10.64 કરોડ (US$ 1.28 મિલિયન)થી સંતોષ માનવો પડશે. સેમિફાઇનલ રમીને બહાર થનારી ટીમોને રૂ. 6.54 કરોડ (787,500 યુએસ ડોલર) મળશે.

સુપર-એટ રાઉન્ડમાંથી બહાર થયા પછી પણ પૈસાનો વરસાદ

જે ટીમો બીજા રાઉન્ડ એટલે કે સુપર-8 રાઉન્ડને પાર કરવામાં નિષ્ફળ જશે તેને 3.17 કરોડ રૂપિયા (382,500 યુએસ ડોલર) મળશે. તે જ સમયે, 9માથી 12મા ક્રમે રહેલી ટીમોને 2.05 કરોડ રૂપિયા (247,500 યુએસ ડોલર) મળશે. 13માથી 20મા ક્રમે આવેલી દરેક ટીમને 1.87 કરોડ રૂપિયા (US$225,000) મળશે. આ સિવાય દરેક ટીમને ટૂર્નામેન્ટમાં મેચ જીતવા બદલ વધારાના 25.89 લાખ રૂપિયા (31,154 યુએસ ડોલર) આપવામાં આવશે. આમાં સેમિ-ફાઇનલ અને ફાઇનલ મેચનો સમાવેશ થતો નથી. આ નિયમ સુપર-8 રાઉન્ડ સુધી લાગુ રહેશે.

ICC reveal historic prize money for the Men's #T20WorldCup 🤩

Details ⬇️https://t.co/jRhdAaIkmc

— ICC (@ICC) June 3, 2024

કયા રાઉન્ડમાં કેટલા પૈસા આપવામાં આવશે:

રાઉન્ડ અને ઈનામની રકમ

વિજેતા રૂ. 20.36 કરોડ (US$2.45 મિલિયન)

રનર-અપ રૂ. 10.64 કરોડ (US$1.28 મિલિયન)

સેમી ફાઇનલમાં હારવા બદલ રૂ. 6.54 કરોડ (US$787,500).

જો સુપર-8 રાઉન્ડમાંથી બહાર થઈ જાય તો રૂ. 3.17 કરોડ (US$ 382,500)

9માથી 12મા ક્રમે રહેવા માટે રૂ. 2.05 કરોડ (US$247,500)

13માથી 20મા સ્થાન માટે રૂ. 1.87 કરોડ (US$225,000)

T20 વર્લ્ડ કપમાં કુલ 55 મેચ રમાશે.

T20 વર્લ્ડ કપમાં પ્રારંભિક રાઉન્ડ એટલે કે ગ્રુપ સ્ટેજમાં 40 મેચો રમાશે. 20 ટીમોને પાંચ-પાંચના ચાર ગ્રૂપમાં વહેંચવામાં આવી છે. ગ્રુપ સ્ટેજમાં પોતપોતાના ગ્રુપમાં ટોપ પર રહેનારી બે ટીમ સુપર-8માં પહોંચશે. આ પછી સુપર-8 રાઉન્ડ શરૂ થશે. ત્યારબાદ સેમી ફાઈનલ અને ફાઈનલ મેચ 29 જૂને બાર્બાડોસમાં રમાશે. ઈનામી રકમની જાહેરાત કરતી વખતે આઈસીસીએ કહ્યું કે આ ટુર્નામેન્ટ ઘણી રીતે ઐતિહાસિક છે, તેથી ઈનામની રકમ પણ ઐતિહાસિક રાખવામાં આવી છે. અમે આને સૌથી સફળ T20 વર્લ્ડ કપ બનાવવા માંગીએ છીએ.