મહાકુંભમાં ભીષણ આગ: અનેક તંબુઓ બળીને ખાખ, સીએમ યોગી ઘટનાસ્થળે દોડી આવ્યા

મહાકુંભ મેળાના વિસ્તારમાં ભીષણ આગ લાગવાના સમાચાર મળતા જ વિસ્તારમાં ધુમાડાનું સામ્રાજ્ય છવાઈ ગયું હતું, જેના કારણે લોકોને ભારે મુશ્કેલીનો સામનો કરવો પડ્યો હતો.

આગની ગંભીરતાને ધ્યાનમાં રાખીને મુખ્યમંત્રી યોગી આદિત્યનાથ તાત્કાલિક ઘટનાસ્થળે દોડી આવ્યા હતા.

મહાકુંભ મેળાના સેક્ટર ૧૯માં આગ ફાટી નીકળી હતી અને આગની જ્વાળાઓ અને ધુમાડા દૂરથી જોઈ શકાતા હતા. આગના કારણે ઘણા તંબુ બળીને ખાખ થઈ ગયા હતા.

મુખ્યમંત્રી યોગી આદિત્યનાથે કુંભ મેળામાં ગીતા પ્રેસના કેમ્પમાં લાગેલી આગનું નિરીક્ષણ કર્યું હતું. આ દરમિયાન કેબિનેટ મંત્રી નંદ ગોપાલ ગુપ્તા નંદી અને સ્વતંત્ર દેવ સિંહ પણ તેમની સાથે હાજર રહ્યા હતા.

પ્રયાગરાજમાં મહાકુંભ મેળા વિસ્તારમાં આગની ઘટનાની ગંભીર નોંધ લેતા, મુખ્યમંત્રી યોગીએ સ્થળનું નિરીક્ષણ કર્યું હતું અને પરિસ્થિતિની સમીક્ષા કરી હતી.

મુખ્યમંત્રીએ સંબંધિત અધિકારીઓને યુદ્ધના ધોરણે રાહત કાર્ય હાથ ધરવાનો આદેશ આપ્યો હતો.

આ આગની જાણ થતાં જ ફાયર બ્રિગેડની અનેક ગાડીઓ ઘટનાસ્થળે પહોંચી હતી અને આગને કાબૂમાં લેવાના પ્રયાસો શરૂ કર્યા હતા અને આખરે આગ પર કાબૂ મેળવ્યો હતો. જોકે, ત્યાં સુધીમાં ઘણા ટેન્ટ આગની લપેટમાં આવીને બળીને ખાખ થઈ ગયા હતા.

મહાકુંભમાં આગની ઘટના બાદ મેળા વિસ્તારથી લઈને શહેર સુધી ચારેબાજુ ભારે ટ્રાફિક જામ સર્જાયો હતો. મેળા વિસ્તાર તરફ જતા તમામ રસ્તાઓ સંપૂર્ણપણે બ્લોક કરી દેવામાં આવ્યા હતા.

આ અકસ્માત બાદ વાહનો એક ઈંચ પણ આગળ વધી શકતા નહોતા. મોટાભાગના ૩૦ પોન્ટૂન બ્રિજ બંધ હોવાના કારણે અને સીએમ યોગીની મુલાકાતને કારણે પોલીસે સવારથી જ અડધા રસ્તાઓ પર બેરિકેડ લગાવી દીધા હતા. જેના કારણે પરિસ્થિતિ વધુ વિકટ બની ગઈ હતી.