Earthquake: વહેલી સવારે મણિપુર અને અફઘાનિસ્તાનને ભૂકંપના આંચકાએ હચમચાવી નાખ્યું, કોઈ જાન-માલનું નુકસાન નથી

તુર્કીમાં આવેલા તીવ્ર ભૂકંપ બાદ ભારતમાં પણ બેથી ત્રણ ભૂકંપ આવ્યા છે. આ પહેલા 19 ફેબ્રુઆરીએ આંધ્ર પ્રદેશના NTR જિલ્લાના નંદીગામા શહેરમાં ભૂકંપના આંચકા અનુભવાયા હતા.

પ્રતિકાત્મક તસવીર

Earthquake In Manipur And Afghanistan: ભારતના મણિપુર અને અફઘાનિસ્તાનના ભાગોમાં મંગળવાર (28 ફેબ્રુઆરી) ની વહેલી સવારે ભૂકંપના આંચકા અનુભવાયા હતા. નેશનલ સેન્ટર ફોર સિસ્મોલોજી (NCS) અનુસાર, મંગળવારે સવારે 2:46 વાગ્યે આંચકા આવ્યા હતા. તેનું કેન્દ્ર પૃથ્વીની સપાટીથી 25 કિલોમીટરની ઊંડાઈ પર હતું. ભૂકંપની તીવ્રતા રિક્ટર સ્કેલ પર 3.2 માપવામાં આવી હતી.

જો કે રાહતની વાત એ છે કે ભૂકંપના કારણે જાનમાલના નુકસાનના કોઈ સમાચાર નથી. નેશનલ સેન્ટર ફોર સિસ્મોલોજીએ પણ આ વાતની પુષ્ટિ કરી છે. તુર્કીમાં આવેલા તીવ્ર ભૂકંપ બાદ ભારતમાં પણ બેથી ત્રણ ભૂકંપ આવ્યા છે. આ પહેલા 19 ફેબ્રુઆરીએ આંધ્ર પ્રદેશના NTR જિલ્લાના નંદીગામા શહેરમાં ભૂકંપના આંચકા અનુભવાયા હતા. 19 ફેબ્રુઆરીએ જ મધ્યપ્રદેશમાં પણ ભૂકંપના આંચકા અનુભવાયા હતા.

ગુજરાતમાં બે આંચકા

એક દિવસ પહેલા સોમવારે (27 ફેબ્રુઆરી) ગુજરાતના કચ્છ અને અમરેલીમાં ભૂકંપના બે આંચકા અનુભવાયા હતા. તીવ્રતા અનુક્રમે 3.8 અને 3.3 નોંધાઈ હતી. અહીં પણ જાનમાલના નુકસાનની કોઈ માહિતી નથી. આ સિવાય છેલ્લા કેટલાક દિવસોમાં અન્ય કેટલાક રાજ્યોમાં પણ ભૂકંપના આંચકા અનુભવાયા છે. તુર્કીમાં આવેલા ભૂકંપના કારણે અહીંના લોકોમાં ભયનો માહોલ છે. થોડો આંચકો લાગતાની સાથે જ લોકો ઘરની બહાર નીકળી જાય છે.

અફઘાનિસ્તાનમાં વહેલી સવારે ભૂકંપ

મંગળવારે સવારે અફઘાનિસ્તાનમાં પણ ભૂકંપના આંચકા અનુભવાયા હતા. નેશનલ સેન્ટર ફોર સિસ્મોલોજી (NCS) અનુસાર, મંગળવારે અફઘાનિસ્તાનમાં 4.1 તીવ્રતાનો ભૂકંપ આવ્યો હતો. NCSએ ટ્વીટ કરીને આ ભૂકંપ વિશે માહિતી આપી હતી. આ ભૂકંપની ઊંડાઈ 10 કિમીથી નીચે હતી. જો કે રાહતની વાત એ છે કે અફઘાનિસ્તાનમાં ભૂકંપના કારણે કોઈ નુકસાનના સમાચાર નથી.

તુર્કીમાં ભૂકંપ

6 ફેબ્રુઆરીના રોજ આવેલા ભયાનક ભૂકંપમાં 5,20,000 એપાર્ટમેન્ટ્સ ધરાવતી 1,60,000 થી વધુ ઇમારતો ધરાશાયી થઈ હતી અથવા ભારે નુકસાન થયું હતું, જેમાં તુર્કીયે અને પડોશી સીરિયામાં હજારો લોકો માર્યા ગયા હતા. ડિઝાસ્ટર એન્ડ ઇમરજન્સી મેનેજમેન્ટ ઓથોરિટી (એએફએડી) મુજબ, શુક્રવારે રાત્રે ભૂકંપના કારણે તુર્કીયેમાં મૃત્યુઆંક વધીને 44,218 પર પહોંચી ગયો છે. તુર્કીયેના રાષ્ટ્રપતિ તૈયપ એર્દોગને એક વર્ષની અંદર ક્ષતિગ્રસ્ત મકાનો ફરીથી બનાવવાનું વચન આપ્યું છે, જોકે નિષ્ણાતોએ કહ્યું છે કે સત્તાવાળાઓએ ઝડપ પહેલા સલામતી રાખવી જોઈએ.

રોઇટર્સે એક અધિકારીને ટાંકીને જણાવ્યું હતું કે  "કેટલાક પ્રોજેક્ટ્સ માટે ટેન્ડર અને કોન્ટ્રાક્ટ આપવામાં આવ્યા છે. પ્રક્રિયા ખૂબ જ ઝડપથી આગળ વધી રહી છે.  સુરક્ષામાં કોઈ બાંધછોડ કરવામાં આવશે નહીં.અધિકારીઓના જણાવ્યા અનુસાર, ઘણા લોકો માટે તંબુ મોકલવામાં આવ્યા છે જેઓ બેઘર છે. અહેવાલો મુજબ, સરકારની પ્રારંભિક યોજના હવે 15 બિલિયન ડોલરના ખર્ચે 2,00,000 એપાર્ટમેન્ટ્સ અને 70,000 ગામડાના ઘરો બાંધવાની છે. UNDPએ જણાવ્યું હતું કે તેનો અંદાજ છે કે વિનાશને કારણે 1.5 મિલિયનથી વધુ લોકો બેઘર થઈ ગયા છે, જેમાં ઓછામાં ઓછા 5,00,000 નવા ઘરોની જરૂર છે.