Operation Sagar Manthan : NCB અને ગુજરાત ATSએ 700 કિલો ડ્રગ્સ સાથે 8 ઇરાની નાગરિકોની કરી ધરપકડ

Operation Sagar Manthan:  નાર્કોટિક્સ કંટ્રોલ બ્યુરો (NCB), ભારતીય નૌકાદળ અને ગુજરાત પોલીસની ATSના સંયુક્ત ઓપરેશનમાં ભારતીય દરિયાઈ સરહદમાં આશરે 700 કિલો મેથ ડ્રગ્સનું કન્સાઈનમેન્ટ ઝડપાયું હતું. આ ઓપરેશન દરમિયાન 8 વિદેશી નાગરિકોની પણ ધરપકડ કરવામાં આવી છે, જેઓ પોતાને ઈરાની ગણાવી રહ્યા છે. રિકવર કરાયેલી દવાઓની કિંમત લગભગ 2000 કરોડ રૂપિયા છે.

છેલ્લા ઘણા દિવસોથી નાર્કોટિક્સ કંટ્રોલ બ્યુરો સાગર મંથનના નામે ઓપરેશન ચલાવી રહ્યું છે. ખાસ કરીને ભારતમાં ડ્રગ્સની દાણચોરી માટે આ ઓપરેશન હાથ ધરવામાં આવી રહ્યું છે. આ પહેલા પણ નાર્કોટિક્સ ટીમે ઓપરેશન સાગર મંથનમાં અનેક કિલો ડ્રગ્સ રિકવર કર્યું છે, નાર્કોટિક્સ કંટ્રોલ બ્યુરોના જણાવ્યા અનુસાર, આ ઓપરેશનનો હેતુ દરિયાઈ માર્ગે ડ્રગ્સની દાણચોરીને રોકવાનો છે.

NCB અનુસાર, એક નક્કર માહિતી મળી હતી કે એક અનરજિસ્ટર્ડ જહાજ, જેમાં AIS (ઓટોમેટિક આઇડેન્ટિફિકેશન સિસ્ટમ) પણ નથી. તે ભારતીય પ્રાદેશિક જળસીમામાં નશીલા પદાર્થો લઈને આવી રહ્યું છે. આ ઇનપુટના આધારે, "સાગર-મંથન-4" નામથી ઓપરેશન શરૂ કરવામાં આવ્યું હતું. ભારતીય નૌકાદળે તેના મેરીટાઇમ સર્ચ ઓપરેશન દ્વારા આ જહાજને પકડ્યું હતું. આ ઓપરેશન 15 નવેમ્બર 2024ના રોજ કરવામાં આવ્યું હતું. આ ઓપરેશનમાં વિદેશની નાર્કોટિક્સ એજન્સીઓની પણ મદદ લેવામાં આવી રહી છે જેથી આ ડ્રગ સિન્ડિકેટની આગળ-પાછળની કડીઓ શોધી શકાય.