ચંદ્ર બાદ હવે આ ગ્રહ પર મિશનની તૈયારીમાં છે ISRO, પ્રમુખ એસ સોમનાથે જણાવ્યું રસપ્રદ કારણ
ISRO Venus Mission: ભારતીય અવકાશ સંશોધન સંસ્થા (ISRO) ના અધ્યક્ષ એસ સોમનાથે કહ્યું છે કે શુક્ર મિશન માટે તમામ પેલોડ તૈયાર કરવામાં આવ્યા છે અને તે ટૂંક સમયમાં લોન્ચ કરવામાં આવશે.
ISRO Mission To Venus: ભારત હવે અંતરિક્ષની રેસમાં દૂરના અવકાશના અજાણ્યા રહસ્યો શોધવા માટે ઝડપી ગતિએ આગળ વધી રહ્યું છે. પૃથ્વીની સૌથી નજીકના અવકાશી પદાર્થો ચંદ્ર, મંગળ અને સૂર્યનો અભ્યાસ કરવાના સફળ મિશન પછી, ભારતીય અવકાશ સંશોધન સંસ્થા (ઇસરો)એ હવે શુક્ર ગ્રહના રહસ્યો શોધવાની તૈયારી કરી લીધી છે. ઈસરોના અધ્યક્ષ એસ સોમનાથે મંગળવારે (26 સપ્ટેમ્બર) આની જાહેરાત કરી છે.
રાજધાની નવી દિલ્હીમાં ઈન્ડિયન નેશનલ સાયન્સ એકેડમીને સંબોધતા સોમનાથે કહ્યું કે આપણા નક્ષત્રના સૌથી તેજસ્વી ગ્રહ શુક્ર પર મિશન મોકલવા માટે તમામ તૈયારીઓ પૂર્ણ કરી લેવામાં આવી છે. આ માટે પેલોડ્સ પહેલેથી જ વિકસાવવામાં આવ્યા છે. પૃથ્વી અને શુક્ર વચ્ચેની સામ્યતાનો ઉલ્લેખ કરતાં સોમનાથે કહ્યું, "શુક્ર એક રસપ્રદ ગ્રહ છે અને તેનું અન્વેષણ કરવાથી અવકાશ વિજ્ઞાન ક્ષેત્રના કેટલાક પ્રશ્નોના જવાબો મળશે."
શુક્રનું વાતાવરણ એસિડથી ભરેલું છે
તેમણે કહ્યું, "પૃથ્વીની જેમ, શુક્રનું પણ વાતાવરણ છે. તેનું વાતાવરણ ખૂબ જ ઘટ્ટ છે. વાતાવરણનું દબાણ પૃથ્વી કરતાં 100 ગણું છે અને તે એસિડથી ભરેલું છે. તમે તેની સપાટીમાં પ્રવેશી શકતા નથી. તેની સપાટી કેવી છે તે તે તમે જાણતા નથી.
પૃથ્વી પર પણ જીવન માટે ભવિષ્યના મુશ્કેલ પડકારોનો ભય વ્યક્ત કરતાં તેમણે કહ્યું કે, અમે શુક્રને સમજવાનો પ્રયાસ કરી રહ્યા છીએ કારણ કે પૃથ્વી પરની સ્થિતિ પણ એક દિવસ શુક્ર જેવી બની શકે છે. બની શકે છે કે 10,000 વર્ષ પછી આપણો ગ્રહ તેની વિશેષતાઓ બદલશે. પૃથ્વી આજની જેમ ક્યારેય ન હતી. લાંબા સમય પહેલા તે રહેવા યોગ્ય ન હતું. પરંતુ ધીરે ધીરે પરિસ્થિતિ બદલાઈ ગઈ અને આજે અહીં જીવન જ જીવન છે.
શુક્રને પૃથ્વીનો જોડિયા પણ કહેવામાં આવે છે કારણ કે તે કદ અને ઘનતામાં પૃથ્વી સમાન છે.
સોમનાથે એમ પણ કહ્યું કે ભારતમાં રોકેટના ઉત્પાદનમાં વપરાતા લગભગ 95 ટકા ઘટકો સ્થાનિક સ્ત્રોતોમાંથી બનાવવામાં આવે છે. રોકેટ અને સેટેલાઇટના વિકાસ સહિત તમામ ટેકનિકલ કામ દેશમાં જ થાય છે.
કયા દેશોએ શુક્ર પર મિશન મોકલ્યા છે?
શુક્ર સંબંધિત મિશનમાં, અમેરિકન અવકાશ સંશોધન સંસ્થા નાસાના પાર્કર સોલર પ્રોબએ પણ શુક્રના અનેક પરિક્રમા કર્યા છે. 9 ફેબ્રુઆરી, 2022 ના રોજ, નાસાએ માહિતી આપી હતી કે પાર્કર સોલર પ્રોબે ફેબ્રુઆરી 2021 માં અવકાશમાંથી શુક્રની સપાટીની પ્રથમ દૃશ્યમાન પ્રકાશની છબી લીધી હતી.
આ સિવાય યુરોપિયન સ્પેસ એજન્સી (ESA)ની વિનસ એક્સપ્રેસ (જે 2006 થી 2016 સુધી ભ્રમણ કરી રહી હતી) અને જાપાનની Akatsuki Venus Climate Orbiter (જે 2016 થી ભ્રમણ કરી રહી હતી)નો સમાવેશ થાય છે.
તમને જણાવી દઈએ કે ઈસરોએ અગાઉ 2014માં મંગળયાનને મંગળ પર ઉતારીને ઈતિહાસ રચ્યો હતો. આ પછી, તાજેતરમાં ચંદ્ર પર ચંદ્રયાન-3 નું ઐતિહાસિક લેન્ડિંગ થયું છે. ઉપરાંત, આદિત્ય એલ-1 મિશન સૂર્યના બાહ્ય સ્તરનો અભ્યાસ કરવા માટે સફળતાપૂર્વક લોન્ચ કરવામાં આવ્યું છે, જે હાલમાં એલ-1 બિંદુ સુધી પહોંચવાના માર્ગ પર છે.
ટ્રેન્ડિંગ સમાચાર
ટોપ સ્ટોરી
