Gujarat Budget 2025: બજેટમાં શિક્ષણને મહત્વ, મોટાપાયે થશે શિક્ષકોની ભરતી, AI લેબ માટે કરોડોની જોગવાઇ

Gujarat Budget 2025: ગુજરાતનું વર્ષ 2025-26નું 3 લાખ 70 હજાર 250 કરોડનું બજેટ રજૂ કરવામા આવ્યું હતું

પ્રતિકાત્મક તસવીર

Source : ABPLIVE AI

Gujarat Budget 2025: ગુજરાતનું વર્ષ 2025-26નું 3 લાખ 70 હજાર 250 કરોડનું બજેટ રજૂ કરવામા આવ્યું હતું. બજેટમાં શિક્ષણ વિભાગ માટે 59 હજાર 999 કરોડ રૂપિયાની જોગવાઇ કરવામાં આવી હતી. બજેટ રજૂ કરતા નાણામંત્રી કનુભાઇ દેસાઇએ કહ્યું હતું કે ગુજરાતની શિક્ષણ પદ્ધતિ 21મી સદીની આવશ્યકતાઓ અને વૈશ્વિક બજારની માંગ અનુસાર બદલાઈ રહી છે. ટેકનોલોજી, ઇનોવેશન અને કુશળતા વિકાસ દ્વારા વિકસિત ભારત 2047ના સંકલ્પને સાકાર કરવામાં ગુજરાત અગત્યનો ભાગ ભજવશે. હજારોની સંખ્યાની શિક્ષકોની ભરતી કરવાની સરકારની યોજના છે. તથા સરકારની ટેકનિકલ સંસ્થાઓમાં એઆઇ લેબ બનાવવાની પણ જાહેરાત કરાઇ હતી.

તેમણે કહ્યું હતું કે મિશન સ્કૂલ્સ ઓફ એક્સેલન્સ અંતર્ગત પ્રાથમિક અને માધ્યમિક શાળાઓના આશરે 25 હજારથી વધુ વર્ગખંડોના માળખાગત સુધારણા માટે 2914 કરોડ રૂપિયાની જોગવાઇ કરવામાં આવી છે. નમો લક્ષ્મી યોજના માટે 1250 કરોડ રૂપિયાની જોગવાઇ કરાઇ હતી. રાઇટ ટુ એજયુકેશન એકટ અંતર્ગત રાજ્યમાં ખાનગી શાળાઓમાં પ્રવેશ મેળવનાર વિદ્યાર્થીઓ માટે 782 કરોડ રૂપિયાની જોગવાઇ કરાઇ હતી.

નમો સરસ્વતી વિજ્ઞાન સાધના યોજના અંતર્ગત અંદાજે 2 લાખ 50 હજાર વિદ્યાર્થીઓને સહાય માટે 250 કરોડ રૂપિયાની જોગવાઇ કરાઇ હતી. એસ.ટી.નિગમની બસોમાં મુસાફરી કરતા વિદ્યાર્થીઓને બસ પાસ ફી કન્સેશન માટે 223 કરોડ રૂપિયાની ફાળવણી કરાઇ હતી. જ્ઞાનશક્તિ રેસિડેન્શીયલ સ્કૂલ્સ ઑફ એકસલન્‍સ માટે 200 કરોડ રૂપિયાની જોગવાઇ કરી હતી. સરકારી પ્રાથમિક શાળાઓ, સરકારી અને અનુદાનિત માધ્યમિક અને ઉચ્ચત્તર માધ્યમિક શાળાઓમાં અંદાજીત 22 હજાર કરતાં વધુ શિક્ષકોની ભરતી કરવાની પ્રક્રિયા પ્રગતિમાં છે.

મુખ્યમંત્રી જ્ઞાનસાધના મેરિટ સ્કોલરશીપ હેઠળ અંદાજે 75 હજાર વિદ્યાર્થીઓને સહાય માટે 100 કરોડ રૂપિયા, મુખ્યમંત્રી જ્ઞાનસેતુ મેરિટ સ્કોલરશીપ અંતર્ગત અંદાજે 90 હજાર વિદ્યાર્થીઓને સહાય માટે 70 કરોડ રૂપિયા, મુખ્યમંત્રી યુવા સ્વાવલંબન યોજના(MYSY) અંતર્ગત અંદાજે 78 હજાર વિદ્યાર્થીઓને સહાય આપવા 410 કરોડ રૂપિયાની જોગવાઇ કરાઇ હતી.

એલ.ડી.ઈજનેરી કોલેજ-અમદાવાદ ખાતે ડેમોન્સ્ટ્રેટીવ આર્ટીફિશીયલ ઇન્ટેલિજન્સ લેબ અને અન્ય છ સરકારી ટેકનિકલ સંસ્થાઓ ખાતે આર્ટીફિશીયલ ઇન્ટેલિજન્સ લેબની સ્થાપના માટે 175 કરોડ રૂપિયાની ફાળવણી કરાઇ હતી. મુખ્યમંત્રી શિષ્યવૃત્તિ યોજના(CMSS) અંતર્ગત 2500 વિદ્યાર્થીઓને સહાય આપવા 32 કરોડ રૂપિયાની જોગવાઇ કરાઇ હતી.

વિદ્યાર્થીઓ ગ્રીન એનર્જી, સેમિકન્‍ડકટર, ફિનટેક, એરોસ્પેસ વગેરે વિષયોમાં કૌશલ્ય વિકાસ થકી આગામી સમયમાં ઉદ્‍ભવનાર તકનો લાભ મેળવી શકે તે હેતુથી ગુજરાત ઇન્‍સ્ટિટ્યુટ ઓફ ટેકનોલોજી (GIT) માટે 100 કરોડ રૂપિયા, રાજ્યનો વિદ્યાર્થી વધુ તેજસ્વી, પ્રતિભાશાળી, જ્ઞાન સમૃદ્ધ અને સ્પર્ધાત્મક બને તે માટે ગુજરાત જ્ઞાન ગુરૂ ક્વિઝ(G3Q) અંતર્ગત 30 કરોડ રૂપિયા, અમદાવાદના i-Hubની તર્જ પર રાજ્યમાં 04 પ્રાદેશિક કેન્દ્રોની સ્થાપનાનું આયોજન. i-Hub મારફતે સ્ટાર્ટઅપ્સ-ઇનોવેટર્સને નાણાકીય સહાય માટે 25 કરોડ રૂપિયાની જોગવાઇ કરાઇ હતી.

શોધ યોજના – (Scheme of Developing High quality research) અંતર્ગત પી.એચ.ડી. કોર્સમાં સંશોધન કરતાં વિદ્યાર્થીઓને આર્થિક સહાય માટે 20 કરોડ, NAAC અને NIRF રેન્‍કિંગમાં સારા પ્રદર્શન હેતુ પાંચ કાર્યરત સરકારી કોલેજોના વર્ગખંડોને સ્માર્ટ ક્લાસરૂમ બનાવવા માટે 8 કરોડ રૂપિયાની જોગવાઇ કરી હતી.