Gujarat Election 2022: ચૂંટણીમાં રજા લઈને મત આપવા નહીં જનારા લોકોના નામ લાગશે નોટિસ બોર્ડ પર, EC સાથે ગુજરાતની 1000 કંપનીએ કર્યો કરાર

Gujarat Election 2022: ગુજરાતના એક હજારથી વધુ કોર્પોરેટ હાઉસે ચૂંટણી પંચ સાથે કરાર કર્યા છે. આ કરાર અનુસાર, કોર્પોરેટ હાઉસ તેમના કર્મચારીઓ ચૂંટણીમાં તેમના મતનો ઉપયોગ કરે છે કે નહીં તેની દેખરેખ રાખશે.

તસવીરનો ઉપયોગ પ્રસ્તુતિકરણ માટે કરવામાં આવ્યો છે

Gujarat Assembly Election 2022: ગુજરાતમાં આગામી વિધાનસભાની ચૂંટણીની તૈયારીઓ જોરશોરથી ચાલી રહી છે. દરમિયાન હવે ગુજરાતના એક હજારથી વધુ કોર્પોરેટ હાઉસે ચૂંટણી પંચ સાથે કરાર કર્યા છે. આ કરાર અનુસાર, કોર્પોરેટ હાઉસ તેમના કર્મચારીઓ ચૂંટણીમાં તેમના મતનો ઉપયોગ કરે છે કે નહીં તેની દેખરેખ રાખશે. આ સાથે જે કર્મચારીઓએ વોટ નથી કર્યો તેમના નામ કંપનીની વેબસાઈટ અને નોટીસ બોર્ડ પર લખવામાં આવશે.

ગુજરાતના મુખ્ય ચૂંટણી અધિકારી (CEC) પી ભારતીએ ધ ઈન્ડિયન એક્સપ્રેસને જણાવ્યું હતું કે, “અમે 233 એમઓયુ (મેમોરેન્ડમ ઑફ અન્ડરસ્ટેન્ડિંગ) પર હસ્તાક્ષર કર્યા છે જે અમને ચૂંટણી પંચની માર્ગદર્શિકાના અમલમાં મદદ કરશે. ગુજરાતમાં પ્રથમ વખત અમારી પાસે 1,017 ઔદ્યોગિક એકમો ચૂંટણીમાં દેખરેખ રાખશે.

કંપનીઓમાં નોડલ અધિકારીઓની નિમણૂક

ઇન્ડિયન એક્સપ્રેસના અહેવાલ મુજબ, ચૂંટણી પંચે જૂનમાં કેન્દ્ર અને રાજ્ય સરકારના વિભાગો, જાહેર ક્ષેત્રના એકમો અને 500 થી વધુ કર્મચારીઓ ધરાવતી કોર્પોરેટ સંસ્થાઓને મતદાન કરનાર કર્મચારીઓની ઓળખ કરવા માટે નોડલ અધિકારીઓની નિમણૂક કરવા જણાવ્યું હતું. જે લોકો મતદાનના દિવસે રજા લેતા હતા પરંતુ મતદાન કરતા નહોતા તેમના પર નજર રાખવા આમ કરવા કહ્યું હતું.

'વેબસાઈટ અને નોટિસ બોર્ડ પર લખાશે નામ

પી ભારતીએ જણાવ્યું હતું કે, “અમારી પહોંચ વિસ્તારવા માટે, અમે ગુજરાતમાં 100 કે તેથી વધુ લોકોને રોજગારી આપતા ઉદ્યોગો પર દેખરેખ રાખવાનું નક્કી કર્યું છે. આ એકમોમાં નોડલ ઓફિસર તરીકે માનવ સંસાધન અધિકારીઓની નિમણૂક કરવામાં આવી છે. જેઓ મતદાન નથી કરતા તેમની યાદી તૈયાર કરીશું. આ સાથે , તેઓ તેમની વેબસાઇટ અને નોટિસ બોર્ડ પર આ લોકોના નામ પણ લખશે. એ જ રીતે જે લોકો મતદાન નહીં કરે તેમના પર નજર રાખવામાં આવશે, એમ તેમણે જણાવ્યું હતું.

મુખ્ય ચૂંટણી કમિશનરે શું કહ્યું?

આ નીતિ અંગે મુખ્ય ચૂંટણી કમિશનર રાજીવ કુમારે જણાવ્યું હતું કે, “2019ની સામાન્ય ચૂંટણી દરમિયાન સૌથી ઓછી મતદાનની ટકાવારી ધરાવતા સાત જિલ્લાઓમાંથી ચાર મેટ્રોપોલિટન શહેરો હતા. શહેરી વિસ્તારોમાં મતદાનની ટકાવારી સામાન્ય રીતે ઓછી છે, જેના કારણે એકંદરે મતદાનની ટકાવારી ઘટી છે. સાંપ્રત મુદ્દાઓની ચર્ચા માત્ર સોશિયલ મીડિયા પૂરતી સીમિત ન હોવી જોઈએ, પરંતુ મતદાન દ્વારા અભિવ્યક્તિ શોધવાની પણ જરૂર છે. તેથી જ અમે ગ્રામીણ વિસ્તારો, મહિલાઓ અને યુવાનોને મતદાન કરવા વિનંતી કરી રહ્યા છીએ."

ગુજરાતની તેની તાજેતરની મુલાકાત દરમિયાન, સીઈસીએ કહ્યું હતું કે કમિશન ફરજિયાત મતદાનનો અમલ કરી શકતું નથી, પરંતુ તે મોટા ઉદ્યોગોમાં કામદારોને ઓળખવા માંગે છે જે રજા હોવા છતાં મતદાન કરતા નથી. શું તે ફરજિયાત મતદાન તરફનું પગલું છે કે કેમ તે અંગે પૂછવામાં આવતા તેમણે કહ્યું હતું કે, "મતદાન ફરજિયાત ન હોવાથી, મતદાન ન કરનારાઓને ઓળખવાનો પ્રયાસ છે." જો કે, પી ભારતીએ એમ પણ કહ્યું હતું કે કેટલાક ઉદ્યોગોમાં, મેનેજમેન્ટ પોતે કામદારોને મતદાન કરવાની મંજૂરી આપવા માટે રજા આપવા માટે વલણ ધરાવતું નથી.