દિલ્હીની રાજનીતિનું સસ્પેન્સ ખતમ: દિલ્હીમાં ભાજપ ડેપ્યુટી સીએમ બનાવશે કે નહીં? ચિત્ર થયું સ્પષ્ટ

મુખ્યમંત્રીના નામ પર મંથન યથાવત: પીએમ મોદીના અમેરિકાથી પરત ફર્યા બાદ અંતિમ નિર્ણય.

ભાજપ દિલ્હીમાં બે ડેપ્યુટી સીએમ બનાવશે?

Source : PTI

Delhi BJP government deputy CM: દિલ્હીમાં ભારતીય જનતા પાર્ટી (ભાજપ)ની નવી સરકારમાં કોણ મુખ્યમંત્રી બનશે તે અંગે ચાલી રહેલી અટકળો વચ્ચે, હવે ડેપ્યુટી મુખ્યમંત્રી પદને લઈને પણ એક મહત્વપૂર્ણ અપડેટ સામે આવ્યું છે. પાર્ટીના એક વરિષ્ઠ નેતાએ સ્પષ્ટ કર્યું છે કે દિલ્હીમાં નાયબ મુખ્યમંત્રી બનાવવાની કોઈ સંભાવના નથી, જેથી આ પદને લઈને ચાલી રહેલા સસ્પેન્સનો અંત આવ્યો છે.

દિલ્હીના મુખ્યમંત્રી પદના નિર્ણયને લઈને ભાજપમાં છેલ્લા કેટલાક દિવસોથી ગહન મંથન ચાલી રહ્યું છે. વડાપ્રધાન નરેન્દ્ર મોદી હાલ અમેરિકાના પ્રવાસે હોવાથી તેમના પરત ફર્યા બાદ જ આ અંગે અંતિમ નિર્ણય લેવામાં આવશે. પાર્ટીના સૂત્રો મુજબ, નવા મુખ્યમંત્રી ધારાસભ્યોમાંથી જ કોઈ હશે.

દરમિયાન, પાર્ટીના વરિષ્ઠ નેતાઓ નવી સરકારમાં કોને કઈ જવાબદારી સોંપવી અને કેબિનેટમાં સામાજિક સમીકરણો કેવી રીતે જાળવવા તે અંગે પણ ગંભીરતાથી વિચારણા કરી રહ્યા છે. જો કે, ડેપ્યુટી સીએમ પદની શક્યતાને પાર્ટીના વરિષ્ઠ નેતાએ નકારી કાઢી છે, જેનાથી સ્પષ્ટ થાય છે કે ભાજપ દિલ્હીમાં એક મુખ્યમંત્રી પદ સાથે જ સરકાર ચલાવશે.

સમાચાર એજન્સી પીટીઆઈ સાથે વાત કરતા પાર્ટીના એક વરિષ્ઠ નેતાએ જણાવ્યું હતું કે, "ટોચનું નેતૃત્વ વિવિધ વિકલ્પો પર વિચાર કરી રહ્યું છે અને વડાપ્રધાન મોદીના પરત ફર્યા બાદ ટૂંક સમયમાં અંતિમ નિર્ણય લેવામાં આવશે." જ્યારે તેમને રાજસ્થાન, મધ્યપ્રદેશ અને છત્તીસગઢ જેવા રાજ્યોની જેમ દિલ્હીમાં પણ નાયબ મુખ્યમંત્રી બનાવવાની શક્યતા વિશે પૂછવામાં આવ્યું ત્યારે તેમણે કહ્યું કે, "તે અસંભવિત છે." તેમના આ નિવેદનથી ડેપ્યુટી સીએમ પદને લઈને ચાલતી અટકળો પર પૂર્ણવિરામ મુકાઈ ગયું છે.

ઉલ્લેખનીય છે કે, ગત આમ આદમી પાર્ટી (AAP) સરકારમાં મનીષ સિસોદિયા લાંબા સમય સુધી નાયબ મુખ્યમંત્રી રહ્યા હતા. કથિત આબકારી કૌભાંડ કેસમાં તેમની ધરપકડ થયા બાદ તેમણે રાજીનામું આપ્યું હતું.

તાજેતરમાં 5 ફેબ્રુઆરીએ યોજાયેલી વિધાનસભા ચૂંટણીમાં ભાજપે આમ આદમી પાર્ટીને હરાવીને 26 વર્ષ બાદ દિલ્હીમાં સત્તામાં પુનરાગમન કર્યું છે. ભાજપે 70 વિધાનસભા બેઠકોમાંથી 48 બેઠકો પર ભવ્ય જીત મેળવી છે. હવે સૌની નજર મુખ્યમંત્રી પદ માટે ભાજપ કોના નામની જાહેરાત કરે છે તેના પર મંડાયેલી છે.

આ પણ વાંચો...