ભારત સરકારની ડિજિટલ સ્ટ્રાઈક: રાષ્ટ્રીય સુરક્ષાને ખતરો હોવાથી 100થી વધુ વિદેશી એપ્સ પર લગાવ્યો પ્રતિબંધ

ગૂગલ પ્લે સ્ટોર પરથી 119 એપ્સ હટાવવાનો આદેશ, ચીન અને હોંગકોંગની એપ્સ મુખ્ય નિશાના પર.

પ્રતિકાત્મક તસવીર

Source : એબીપી લાઇવ

India bans 119 apps: ભારત સરકારે એક મોટા પગલાં હેઠળ રાષ્ટ્રીય સુરક્ષા અને જાહેર વ્યવસ્થાને ધ્યાનમાં રાખીને 100 થી વધુ વિદેશી એપ્લિકેશનો પર પ્રતિબંધ મૂકવાનો આદેશ જારી કર્યો છે. આ કાર્યવાહીમાં ગૂગલ પ્લે સ્ટોર પરથી 119 જેટલી એપ્સને બ્લોક કરવાનો આદેશ આપવામાં આવ્યો છે, જેમાં મોટાભાગની એપ્લિકેશનો હોંગકોંગ અને ચીન સ્થિત છે.

ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રાલયે આઇટી એક્ટની કલમ 69A હેઠળ આ આદેશ જારી કર્યો છે. આ કલમ સરકારને રાષ્ટ્રીય સુરક્ષા અને જાહેર વ્યવસ્થા માટે ખતરો રૂપ હોય તેવી કોઈપણ સામગ્રી અથવા પ્લેટફોર્મને બ્લોક કરવાની સત્તા આપે છે. બ્લોક કરવામાં આવેલી એપ્લિકેશનોમાં મુખ્યત્વે વિડિયો અને વોઈસ ચેટિંગ એપ્લિકેશનોનો સમાવેશ થાય છે, જે યુઝર્સની માહિતી અને ડેટા સુરક્ષા માટે જોખમી હોવાનું માનવામાં આવે છે.

સૂત્રોના જણાવ્યા અનુસાર, બ્લોક કરવામાં આવેલી તમામ એપ્લિકેશનો વિદેશી છે, અને તેમાં માત્ર ચીન કે હોંગકોંગ જ નહીં, પરંતુ સિંગાપોર, અમેરિકા, યુનાઇટેડ કિંગડમ અને ઓસ્ટ્રેલિયા જેવા દેશો સાથે સંબંધિત એપ્લિકેશનોનો પણ સમાવેશ થાય છે. મનીકંટ્રોલના અહેવાલ મુજબ, આ આદેશ પછી પણ, 119માંથી હાલમાં માત્ર 15 જેટલી એપ્સને ગૂગલ પ્લે સ્ટોર પરથી દૂર કરવામાં આવી છે, જ્યારે બાકીની એપ્સ હજુ પણ ડાઉનલોડ માટે ઉપલબ્ધ છે, જે અમલીકરણ પ્રક્રિયા પર સવાલ ઉભા કરે છે.

કેટલીક એપ્સના ડેવલપર્સનું કહેવું છે કે તેમને ગૂગલ દ્વારા આ કાર્યવાહી અંગે જાણ કરવામાં આવી છે અને તેઓ આ મુદ્દાને ઉકેલવા માટે ભારત સરકાર સાથે સહકાર્ય કરવા તૈયાર છે. બ્લોક કરવામાં આવેલી મુખ્ય એપ્લિકેશનોમાં ChangApp, HoneyCam અને ChillChat જેવી લોકપ્રિય એપ્સનો સમાવેશ થાય છે, જે યુવા વર્ગમાં ખાસ કરીને પ્રચલિત છે.

ઘણા ડેવલપર્સ આ પ્રતિબંધ અંગે વધુ સ્પષ્ટતાની અપેક્ષા રાખી રહ્યા છે. તેમનું માનવું છે કે આ અચાનક લેવાયેલા નિર્ણયથી તેમના વ્યવસાય અને એપ્લિકેશનના ભારતીય યુઝર્સ પર ગંભીર અસર પડશે. કેટલાક ડેવલપર્સે સરકાર સાથે વાતચીત કરીને સમસ્યાનો ઉકેલ લાવવાની તૈયારી પણ દર્શાવી છે.

ઉલ્લેખનીય છે કે, ભારત સરકારે 2020માં ચીન સાથે સરહદી તણાવ વધ્યા બાદ ચીની એપ્લિકેશનો પર ડિજિટલ સ્ટ્રાઈક શરૂ કરી હતી. તે સમયે પણ TikTok, UC બ્રાઉઝર અને PUBG જેવી લોકપ્રિય 100થી વધુ ચાઈનીઝ એપ્સને બ્લોક કરવામાં આવી હતી. જો કે, બાદમાં કેટલીક એપ્લિકેશનો નવા સ્વરૂપમાં ભારતમાં ફરીથી શરૂ થઈ છે. આ નવી કાર્યવાહી ડિજિટલ સુરક્ષા અને રાષ્ટ્રીય હિતોની સુરક્ષા માટે સરકારની સતર્કતા અને કડક અભિગમ દર્શાવે છે.

આ પણ વાંચો....