સુરતઃ વરસાદથી નીચાણવાળા વિસ્તારોમાં ગોઠણસમા ભરાયા પાણી, ખાડીનું પાણી શહેરમાં ફરી વળ્યું

પર્વત પાટીયા ખાડી કાંઠે આવેલા નૈમીનાથ અને કૈલાસ બંગલો પાસે પાણી ભરાઈ ગયા છે.

સુરતઃ ગુજરાતમાં આગામી ચાર દિવસ ભારેથી અતિભારે વરસાદની આગાહી કરવામાં આવી આવી છે. હવમાન વિભાગ અનુસાર સૌરાષ્ટ્ર, દક્ષિણ ગુજરાત, મધ્ય ગુજરાત, ઉત્તર ગુજરાતના કેટલાક સ્થળોએ ભારે વરસાદ પડી શકે છે. આજે ઉત્તર ગુજરાતના બનાસકાંઠા, પાટણ, સાબરકાંઠામાં તો દક્ષિણ ગુજરાતના સુરત, ડાંગ, નવસારી, દમણ, દાદરાનગર હવેલી, જૂનાગઢ, ગીર સોમનાથમાં ભારે વરસાદ પડી શકે છે. હવામાન વિભાગની આગાહી મુજબ, ડાયમંડ નગરી સુરતમાં આજે કાળા ડિબાંગ વાદળો વચ્ચે સાર્વત્રિક વરસાદ પડ્યો છે. શહેરના અઠવાલાઈન્સ, ઉમરા, ઘોડદોડ રોડ, પાર્લે પોઈન્ટ, નાનપુરા, ચોક, અડાજણ, પાલ, વરાછા, કાપોદ્રા સહિતના વિસ્તારમાં વરસાદ પડી રહ્યો છે. ખેતી અનુકૂળ વરસાદના પગલે ખેડૂતોને રાહત થઈ છે. સુરતમાં સવારથી શરૂ થયેલા વરસાદના કારણે નીચાણવાળા વિસ્તારોમાં પાણી ભરાઈ ગયા છે. કડોદરા ચાર રસ્તા નજીક આવેલી તમામ સોસાયટી, ચાલીના ઘરોમાં ગોઠણસમા પાણી ભરાઈ ગયા છે. જેના કારણે અહીં રહેતા લોકોની મુશ્કેલી પણ વધી છે. વરસાદના કારણે ખાડીના પાણી શહેરમાં પ્રવેશી ગયા છે. રણછોડનગરમાં રોડ રસ્તા પર ખાડીના પાણી ફરી વળ્યા છે. પર્વત પાટીયા ખાડી કાંઠે આવેલા નૈમીનાથ અને કૈલાસ બંગલો પાસે પાણી ભરાઈ ગયા છે. આ વિસ્તારમાં ખાડીના પાણી દુકાનો અને ઘરમાં ઘૂસી ગયા છે.