હવે અમદાવાદમાં ગરમી નહીં લાગે આકરી! AMC એ કરી જોરદાર તૈયારી! પાણીની પરબથી લઈને હોસ્પિટલમાં સ્પેશિયલ વોર્ડ સુધી!
BRTS સ્ટેશનથી હોસ્પિટલ સુધી ORS અને પાણીની સુવિધા, બાંધકામ સાઇટ્સ પર બપોરે કામકાજ બંધ.
Ahmedabad heat action plan: અમદાવાદમાં ઉનાળાની શરૂઆત થતાની સાથે જ આકરી ગરમીનો સામનો કરવા માટે અમદાવાદ મ્યુનિસિપલ કોર્પોરેશન (AMC) દ્વારા એક વિસ્તૃત હીટ એક્શન પ્લાન જાહેર કરવામાં આવ્યો છે. આ પ્લાન અંતર્ગત શહેરના નાગરિકોને ગરમીથી બચાવવા માટે અનેકવિધ પગલાં લેવામાં આવ્યા છે, જેની વિગતવાર માહિતી નીચે મુજબ છે:
જાહેર સ્થળો પર સુવિધા:
શહેરના તમામ બીઆરટીએસ બસ સ્ટેશનો પર ઓ.આર.એસ. (ઓરલ રિહાઇડ્રેશન સોલ્યુશન) ના પેકેટ અને પીવાના પાણીની વ્યવસ્થા કરવામાં આવી છે. મુસાફરો ગરમીમાં ડિહાઇડ્રેશનથી બચી શકે તે માટે આ સુવિધા ઉપલબ્ધ રહેશે.
અમદાવાદ શહેરના તમામ એએમટીએસ ડેપો અને મોટા જંકશન પર પણ ઓ.આર.એસ. પેકેટ અને પીવાના પાણીની સુવિધા ઉપલબ્ધ કરવામાં આવી છે. આ ઉપરાંત, આ સ્થળોએ મુસાફરોને ગરમીથી રાહત મળી રહે તે માટે કુલર અને પંખાની વ્યવસ્થા પણ કરવામાં આવી છે.
શહેરના દરેક ઝોનમાં સામાજિક સંસ્થાઓ અને બિલ્ડર્સની મદદથી પાણીની પરબો શરૂ કરવામાં આવશે, જેથી જરૂરિયાતમંદ લોકોને સરળતાથી ઠંડુ પાણી મળી રહે.
બાંધકામ અને કામકાજના સ્થળો પર વ્યવસ્થા:
શહેરની તમામ કન્સ્ટ્રક્શન સાઇટ્સ પર કામ કરતા મજૂરો માટે ઓ.આર.એસ. પેકેટ અને પીવાના પાણીની પૂરતી વ્યવસ્થા સુનિશ્ચિત કરવામાં આવી છે.
જ્યારે શહેરમાં રેડ એલર્ટ જાહેર કરવામાં આવશે, તે દરમિયાન બપોરના 12:00 થી 4:00 વાગ્યા સુધી તમામ કન્સ્ટ્રક્શન સાઇટ્સ પર કામ બંધ રાખવાની સૂચના આપવામાં આવશે, જેથી મજૂરો તીવ્ર ગરમીથી સુરક્ષિત રહી શકે.
અમદાવાદ મ્યુનિસિપલ કોર્પોરેશનની તમામ કન્સ્ટ્રક્શન સાઇટ્સ પર ફિલ્ડમાં કામ કરતા કર્મચારીઓ અને મજૂરો માટે પણ ઓ.આર.એસ. પેકેટ અને પીવાના પાણીની વ્યવસ્થા કરવામાં આવી છે.
અન્ય મહત્વપૂર્ણ પગલાં:
જે ધાર્મિક સ્થળોએ લોકોને ખુલ્લા પગે ચાલવાનું થતું હોય, ત્યાં ગરમીથી પગને બચાવવા માટે સફેદ પટ્ટા લગાવવાની કામગીરી હાથ ધરવામાં આવશે.
શહેરના તમામ બગીચા ઉનાળાની સિઝનમાં સવારે 6:00 થી રાત્રિના 11:00 કલાક સુધી ખુલ્લા રહેશે, જેથી લોકો દિવસ દરમિયાન અને સાંજના સમયે પણ ઠંડી હવાનો લાભ લઈ શકે.
દરેક બગીચામાં પીવાના પાણીની સુવિધા ઉપલબ્ધ કરવામાં આવી છે.
ટ્રાફિક પોલીસ સાથે સંકલન કરીને હળવા ટ્રાફિકવાળા જંકશનો પર બપોરે 12:00 થી 4:00 દરમિયાન ટ્રાફિક સિગ્નલ બંધ રાખવાની વ્યવસ્થા કરવામાં આવી છે, જેથી વાહનોના એન્જિન બંધ રહે અને ગરમીનું પ્રમાણ ઘટે.
ઉનાળાની સિઝન દરમિયાન શાળાઓમાં સમયાંતરે વોટરબેલની વ્યવસ્થા કરવામાં આવશે, જેથી બાળકો નિયમિત રીતે પાણી પી શકે.
શહેરની તમામ આંગણવાડીઓ પર ઓ.આર.એસ. પેકેટની વ્યવસ્થા કરવામાં આવી છે.
બાળકોને ગરમીથી બચાવવા માટે આંગણવાડીના સમયમાં પણ ફેરફાર કરવામાં આવ્યો છે.
શહેરના તમામ શેલ્ટર હોમમાં ઘરવિહોણા લોકો માટે ઓ.આર.એસ. પેકેટ અને પીવાના પાણીની વ્યવસ્થા કરવામાં આવી છે.
ઘરવિહોણા લોકોને ગરમીથી બચાવવા માટે શેલ્ટર હોમમાં શિફ્ટ કરવા માટે સતત ડ્રાઇવ ચલાવવામાં આવશે.
તમામ સફાઇ કામદારોને ગરમીથી રક્ષણ મળે તે માટે ઓ.આર.એસ. અને ટોપી (કેપ) ની વ્યવસ્થા કરવામાં આવી છે.
એલર્ટના સમયગાળા દરમિયાન સફાઇ કામદારોના કામગીરીના સમયમાં પણ ફેરફાર કરવામાં આવ્યો છે.
શહેરના તમામ સીએચસી (સમુદાય આરોગ્ય કેન્દ્ર), યુએચસી (શહેરી આરોગ્ય કેન્દ્ર) અને યુ-એચડબલ્યુસી (શહેરી આરોગ્ય અને સુખાકારી કેન્દ્ર) પર ઓ.આર.એસ. કોર્નર બનાવવામાં આવ્યા છે, જ્યાં લોકોને ઓ.આર.એસ. સરળતાથી મળી રહેશે.
શહેરના તમામ ઝોનમાં મોબાઇલ પાણીની પરબની વ્યવસ્થા કરવામાં આવી છે, જે વિવિધ વિસ્તારોમાં ફરીને લોકોને પાણી પૂરું પાડશે.
હીટ રીલેટેડ ઇલનેસ (ગરમી સંબંધિત બીમારીઓ) ના કેસો માટે એલ.જી. હોસ્પિટલ, વી.એસ. હોસ્પિટલ અને શારદાબેન હોસ્પિટલમાં અલગ વોર્ડની વ્યવસ્થા કરવામાં આવી છે. આ ઉપરાંત, સીએચસીમાં પણ આ પ્રકારના દર્દીઓ માટે અલાયદી વ્યવસ્થા કરવામાં આવી છે.
અમદાવાદ મ્યુનિસિપલ કોર્પોરેશન દ્વારા લેવામાં આવેલા આ પગલાં શહેરના નાગરિકોને આકરી ગરમીથી રાહત અપાવવામાં મદદરૂપ થશે. AMC દ્વારા લોકોને પણ ગરમીથી બચવા માટે સાવચેતી રાખવાની અપીલ કરવામાં આવી છે.
ટ્રેન્ડિંગ સમાચાર
ટોપ સ્ટોરી
