Rule Change: LPGથી લઇને ક્રેડિટ કાર્ડ સુધી, એક નવેમ્બરથી થશે આ છ મોટા ફેરફાર

એલપીજી સિલિન્ડરના ભાવમાં ફેરફાર થઈ શકે છે, ત્યારે ક્રેડિટ કાર્ડના નિયમોમાં પણ ફેરફાર થવા જઈ રહ્યા છે

પ્રતિકાત્મક તસવીર

Source : PTI

ઓક્ટોબર મહિનો પૂરો થવાનો છે અને નવેમ્બર શરૂ થવાનો છે. દર મહિનાની જેમ નવેમ્બર મહિનો પણ ઘણા મોટા ફેરફારો લઈને આવી રહ્યો છે (Rule Change From 1st November) આ ફેરફારો પહેલી તારીખથી અમલમાં આવશે અને તમામને અસર કરશે. એલપીજી સિલિન્ડરના ભાવમાં ફેરફાર થઈ શકે છે, ત્યારે ક્રેડિટ કાર્ડના નિયમોમાં પણ ફેરફાર થવા જઈ રહ્યા છે.

પ્રથમ ફેરફાર- LPG સિલિન્ડરની કિંમત

દર મહિનાની પહેલી તારીખે પેટ્રોલિયમ કંપનીઓ ગેસ સિલિન્ડર (LPG Cylinder Price) ના ભાવમાં ફેરફાર કરે છે અને નવા દર જાહેર કરે છે. આ વખતે પણ તેની કિંમતોમાં સુધારો 1, નવેમ્બરે જોવા મળી શકે છે. લાંબા સમયથી સ્થિર રહેલા 14 કિલોના એલપીજી સિલિન્ડરની કિંમતમાં આ વખતે લોકોને ઘટાડો થવાની આશા છે. કોમર્શિયલ ગેસ સિલિન્ડરની કિંમતની વાત કરીએ તો જૂલાઈ મહિનામાં 19 કિલોના એલપીજી સિલિન્ડરની કિંમતમાં ઘટાડો થયો હતો, પરંતુ તે પછી સતત ત્રણ મહિનાથી તેમાં વધારો થઈ રહ્યો છે. આ સમયગાળા દરમિયાન એક સિલિન્ડરની કિંમતમાં 94 રૂપિયાનો વધારો થયો છે. 1 ઓક્ટોબરે દિલ્હીમાં કોમર્શિયલ સિલિન્ડર 48.50 રૂપિયા મોંઘું થયું હતું.

બીજો ફેરફાર- ATF અને CNG-PNG ના દરો

એક તરફ ઓઇલ માર્કેટિંગ કંપનીઓ દર મહિનાની પ્રથમ તારીખે એલપીજી ગેસ સિલિન્ડરના ભાવમાં સુધારો કરે છે. તેની સાથે સીએનજી-પીએનજી સિવાય એર ટર્બાઇન ઇંધણ (એટીએફ) ના ભાવમાં પણ સુધારો કરવામાં આવે છે. છેલ્લા કેટલાક મહિનામાં હવાઈ ઈંધણના ભાવમાં ઘટાડો જોવા મળી રહ્યો છે અને આ વખતે પણ ભાવ ઘટાડવાની તહેવારની ભેટ મળી શકે છે. સિવાય CNG અને PNGની કિંમતોમાં પણ મોટો ફેરફાર જોવા મળી શકે છે.

ત્રીજો ફેરફાર- SBI ક્રેડિટ કાર્ડનો નિયમ

હવે વાત કરીએ 1 નવેમ્બરથી દેશમાં લાગુ થનારા ત્રીજા ફેરફારની જે દેશની સૌથી મોટી સરકારી બેન્ક સાથે સંબંધિત છે. વાસ્તવમાં સ્ટેટ બેન્ક ઓફ ઈન્ડિયા (SBI)ની પેટાકંપની SBI કાર્ડ 1 નવેમ્બરથી મોટા ફેરફારો લાગુ કરવા જઈ રહી છે, જે તેના ક્રેડિટ કાર્ડ દ્વારા યુટિલિટી બિલ પેમેન્ટ્સ અને ફાઇનાન્સ ચાર્જિસ સાથે સંબંધિત છે. જો આપણે ક્રેડિટ કાર્ડના નિયમમાં ફેરફાર વિશે વિગતવાર સમજીએ તો, 1લી નવેમ્બરથી તમારે અન-સિક્યોર્ડ SBI ક્રેડિટ કાર્ડ્સ પર દર મહિને 3.75 રૂપિયાનો ફાઇનાન્સ ચાર્જ ચૂકવવો પડશે. આ સિવાય વીજળી, પાણી, LPG ગેસ અને અન્ય યુટિલિટી સર્વિસિસમાં 50,000 રૂપિયાથી વધુની ચુકવણી પર 1 ટકા વધારાનો ચાર્જ ચૂકવવો પડશે.

ચોથો ફેરફાર- મ્યુચ્યુઅલ ફંડના નિયમો

માર્કેટ રેગ્યુલેટર સેબી (SEBI) એ મ્યુચ્યુઅલ ફંડમાં ઇનસાઇડર ટ્રેડિંગના નિયમોને કડક બનાવવાની તૈયારી કરી છે અને તે પહેલી નવેમ્બરથી અમલમાં આવશે. વાસ્તવમાં મ્યુચ્યુઅલ ફંડ (Mutual Fund Rule)  એકમો માટે લાગુ થવા જઈ રહેલા નવા આંતરિક નિયમો અનુસાર, હવે નોમિની અને તેમના નજીકના સંબંધીઓ દ્વારા એસેટ મેનેજમેન્ટ કંપનીઓ (AMCs) ના ફંડમાં કરવામાં આવેલા 15 લાખ રૂપિયાથી વધુના રોકાણને મંજૂરી આપવામાં આવશે નહીં. ટ્રાન્ઝેક્શન વિશેની માહિતી અનુપાલન અધિકારીને આપવાની રહેશે.

પાંચમો ફેરફાર- ટ્રાઈના નવા નિયમો

1 નવેમ્બરથી થઈ રહેલા મોટા ફેરફારોની યાદીમાં પાંચમો ફેરફાર ટેલિકોમ સેક્ટર સાથે સંબંધિત છે અને આ નવા નિયમો પહેલી તારીખથી લાગુ થઈ શકે છે. વાસ્તવમાં સરકારે JIO, Airtel સહિત તમામ ટેલિકોમ કંપનીઓને મેસેજ ટ્રેસિબિલિટી લાગુ કરવા માટે નિર્દેશ આપ્યો છે. આ અંતર્ગત ટેલિકોમ કંપનીઓને સ્પામ નંબર બ્લોક કરવાનો આદેશ આપવામાં આવ્યો છે. આવી સ્થિતિમાં કંપનીઓ તેમના સિમ યુઝર્સ સુધી મેસેજ પહોંચે તે પહેલા જ મેસેજને સ્પામ લિસ્ટમાં મૂકીને નંબરને બ્લોક કરી શકે છે.

છઠ્ઠો ફેરફાર- 13 દિવસ સુધી બેન્કોમાં કામ નહીં

નવેમ્બરમાં તહેવારો અને જાહેર રજાઓ તેમજ વિધાનસભાની ચૂંટણીના કારણે બેન્કો અનેક દિવસો સુધી બંધ રહેશે. નવેમ્બરમાં કુલ 13 દિવસની બેન્ક રજાઓ રહેશે. આ બેન્ક રજાઓ દરમિયાન તમે બેન્કોની ઓનલાઈન સેવાઓનો ઉપયોગ કરીને તમારું બેંકિંગ સંબંધિત કામ પૂર્ણ કરી શકો છો.