HMPV: અમદાવાદમાં 4 વર્ષના બાળકમાં જોવા મળ્યો HMPV વાયરસ, વધુ એક કેસ નોંધાતા રાજ્યમાં હડકંપ

HMPV Cases: રાજ્યમાં અત્યાર સુધીમાં HMPV ના કુલ 6 કેસ નોંધાયા છે, જેમાં અમદાવાદના ચાર, સાબરકાંઠા જિલ્લામાંથી એક અને કચ્છ જિલ્લામાંથી એક કેસનો સમાવેશ થાય છે

(તસવીર- એબીપી લાઇવ)

Source : એબીપી લાઇવ

HMPV Cases: અમદાવાદની એક ખાનગી હૉસ્પિટલમાં દાખલ 4 વર્ષના બાળકમાં હ્યૂમન મેટાપ્યૂમૉવાયરસ (HMPV) ચેપની પુષ્ટિ થઈ છે. છેલ્લા 10 દિવસમાં અમદાવાદમાં HMPVનો આ પાંચમો કેસ છે. જ્યારે ગુજરાતમાં અત્યાર સુધીમાં કુલ 6 કેસ નોંધાયા છે.

અમદાવાદ મ્યૂનિસિપલ કોર્પૉરેશનના આરોગ્ય અધિકારી ડૉ. ભાવિન સોલંકીએ જણાવ્યું હતું કે 4 વર્ષના બાળકમાં HMPV ચેપની પુષ્ટિ થઈ છે. આ બાળક અમદાવાદના કૃષ્ણનગર વિસ્તારનો રહેવાસી છે અને તેને 13 જાન્યુઆરીએ ખાંસી, શરદી અને તાવની ફરિયાદ સાથે ઝાયડસ હૉસ્પિટલમાં દાખલ કરવામાં આવ્યો હતો. તેમણે કહ્યું કે તે જ દિવસે હૉસ્પિટલમાં લેવામાં આવેલા પરીક્ષણોમાં બાળક HMPV ચેપથી પીડાતું હોવાનું જાણવા મળ્યું.

રાજ્યમાં અત્યાર સુધીમાં HMPV ના કુલ 6 કેસ નોંધાયા છે, જેમાં અમદાવાદના ચાર, સાબરકાંઠા જિલ્લામાંથી એક અને કચ્છ જિલ્લામાંથી એક કેસનો સમાવેશ થાય છે. આ સિઝનમાં અમદાવાદમાં HMPVનો પહેલો કેસ 6 જાન્યુઆરીએ નોંધાયો હતો. ચીનમાં ફાટી નીકળ્યા પછી આ રોગ ચર્ચામાં આવ્યો. ભારતમાં HMPV વાયરસના કેસ ધીમે ધીમે વધી રહ્યા છે. ચીનમાં ઉદ્ભવેલા આ વાયરસની ઝપેટમાં હવે ઘણા પડોશી દેશો પણ આવી ગયા છે.

પહેલીવાર 2001 માં થઇ હતી આ વાયરસની ઓળખ - 
આરોગ્ય મંત્રાલયના જણાવ્યા અનુસાર, HMPV કોઈ નવો વાયરસ નથી. તેની ઓળખ સૌપ્રથમ 2001 માં થઈ હતી અને તે વર્ષોથી સમગ્ર વિશ્વમાં ફેલાઈ રહી છે. નિષ્ણાતોએ જણાવ્યું હતું કે HMPV ને ભાગ્યે જ હોસ્પિટલમાં દાખલ કરવાની જરૂર પડે છે. તો આ બહુ ચિંતાનો વિષય નથી.

સામાન્ય તાવ, શરદી અને ફૂલ જેવા હોય છે લક્ષણો  - 
હ્યૂમન મેટાપ્યૂમૉવાયરસ અથવા HMPV એ એક શ્વસન વાયરસ છે જે માનવ ફેફસાં અને શ્વસન માર્ગમાં ચેપનું કારણ બને છે. તે સામાન્ય રીતે એવી પરિસ્થિતિઓ ઉત્પન્ન કરે છે જે સામાન્ય શરદી અથવા ફ્લૂ જેવી હોય છે. આ વાયરસનો ચેપ પહેલાથી જ આવા રોગો અથવા એલર્જીથી પીડાતા લોકોમાં સામાન્ય છે.

માનવ મેટાપ્યુમોવાયરસ (HMPV) શું છે?

HMPV એક સામાન્ય શ્વસન રોગ છે. આ વાયરસ શ્વસન માર્ગમાં પ્રવેશીને નીચલા અને ઉપલા શ્વસન માર્ગમાં ચેપનું કારણ બને છે. આ કોઈ નવી શોધ નથી અને છેલ્લા કેટલાક વર્ષોમાં જુદા જુદા દેશોમાંથી કેસ નોંધાયા છે. HMPV માટે કોઈ વિશિષ્ટ એન્ટિવાયરલ સારવાર નથી અને તેના ફેલાવાને નિયંત્રિત કરવા માટે નિવારણ એ સૌથી મહત્વપૂર્ણ છે.

HMPV વાયરસના લક્ષણો

HMPV ચેપના સામાન્ય લક્ષણોમાં ખાંસી, શરદી, તાવ વગેરેનો સમાવેશ થાય છે. કેટલાક કિસ્સાઓમાં, ચેપ શ્વાસ લેવામાં તકલીફ અને નાક બંધ થવાનું કારણ પણ બની શકે છે.

આ પણ વાંચો